【為黑面解畫】直認事件不好受 陳奕迅：搞到咁尷尬影響咗其他人

陳奕迅（Eason）最近到各大專院校舉行「L.O.V.E. in F.R.A.M.E.S.大專巡迴分享會」，日前在公開大學的分享會上，因在場有同學玩電話而感到不尊重，Eason黑面請無意交流的同學離開，最後仍然取消了大合照環節。

Eason昨晚與恭碩良到城市大學出席放映及分享會，恭碩良最初在坐在觀眾上，扮學生在台下問問題，見到有學生拎手機影相，他笑說：「我有個問題唔係for你哋（指台上嘉賓），你哋要小心啲呀，個電話，仲敢拎手機出嚟呀？放低個電話喇，我都係冇問題！」Eason亦有在台上解釋此事：「其實係冇所謂，sorry，我唔需要解釋，總之你投入成件事就得，我覺得係咁啫，你唔鍾意，真係可以唔喺度，真係冇所謂。嗰晚個場同呢度差唔多，噚日理大係黑麻麻，佢哋做乜都唔知，anyway唔緊要，唔係重點。」

接着有學生代表：「我哋想講呢件事，但係又唔敢講，既然你咁主動講，我哋都想講番少少。」Eason說：「如果你無端端自己行入嚟聽歌睇戲，其實有乜嘢用？點解你又要喺度呢？我見到真係好礙眼，我係諗過好多方法，可以一路咁樣（反白眼），又或者不如我都拎過手機出嚟，但係驚我做呢樣嘢，大家嘅focus喺我度，會影響台上其他人。」他續說：「我都有諗過玩(嘢)啲，未去到咁㷫嘅時候，走落台去睇吓佢哋玩緊乜嘢，以前我會用呢啲方法『嘩！嗰度咁得意，有綠色字寫住EXIT，不如你出去呀！』反正你都望下面，不如望吓望吓行埋出去呀！」

Eason還說：「我噚日都好認真去做，我都有諗番件事，其實唔係幾好受㗎！發脾氣其實好唔開心，搞到咁尷尬，係影響咗其他人，我唔想make a scene，但結果都make a scene，人就係咁，成件事唔係想教育任何人，只不過係做一個反應，唔知點解嗰日會係咁。」