【狗仔出更】學友長女騷腿迷失中環 18歲張瑤華貪靚做facial

歌神有女初長成！張學友和羅美薇（May May）嘅18歲大女張瑤華（Zoe）新相曝光，日前Zoe單拖現身中環被《蘋果》獨家捕獲，紥馬尾、着熱褲騷腿嘅Zoe青春無敵，濃眉大眼似足媽咪，仲有啲舒淇嘅野性feel㖭！

當日下午約4時，《蘋果》發現Zoe由司機接載抵達皇后大道中，着牛仔熱褲襯黑色外套，將一頭濃黑長髮紥成馬尾，有框眼鏡當太陽超架在頭上，手上拿着一支樽裝水；Zoe落車後邊行邊周圍望，去到歌賦街時發現自己行錯路，即攞手機出嚟睇地址，之後抬頭四圍望路牌名。

跟住Zoe行去上環方向，到太平山街後發現自己越行越錯，旋即返轉頭朝中環方向走，並打開google map睇地圖，最後終於順利搵到蘭桂坊，然後上了某棟大廈嘅美容中心，原來天王女同普遍少女一樣好貪靚，18歲已經做facial扮靚靚，記者望入大廈觀察，見到Zoe似乎係第一次去，因為佢跟職員傾了幾句後，職員就拿份表格給Zoe填寫，佢坐喺度填完後上樓，自己斟嘢飲後等做facial。

學友與May May結婚22年，大女Zoe剛於8月滿18歲，細女瑤萱（Zia）只有13歲，廿四孝老竇學友對兩個寶貝女好疼愛，在香港貴族國際學校讀書嘅Zoe，每年學費逾17萬元，今年6月高中畢業，有網民就影到學友西裝畢挺，低調出席囡囡畢業禮。

由於Zoe讀國際學校性格鬼妹仔，去年網上流出跟外籍男友人Mathis嘅親密抱抱相，疑似戀情曝光，有網民搵到Mathis嘅facebook，由於佢自訂狀況為已婚，然而對象卻不是Zoe，惹來Zoe疑搭上人夫傳聞，不過學友隨即代女否認戀情，指兩人僅朋友關係，Mathis嘅已婚狀況只是遊戲，強調女兒沒有拍拖。