【理財滿FUN】從禮物清單 看穿孩子價值觀

蘋果動新聞
18286758
18286758

一到年尾,節日特別多,先是感恩節、緊接聖誕節、新年,小朋友又會收到好多禮物,熱熱鬧鬧歡度假期。趁節日未到,紫晶會鼓勵阿女將自己想擁有嘅禮物寫出嚟,按渴望程度列出一張清單。

表面上,紫晶同阿女講,爹哋媽咪睇咗呢張清單先買禮物,肯定會啱佢心水又貼心,唔會浪費,但其實張單仲有好大功用。

首先,從佢選擇嘅禮物同排列位置,我哋可以了解多啲仔女嘅價值觀同喜好,例如會唔會太過物質主義?注重名牌?如果清單上多數都係書籍,咁我同老公會鬆一口氣。相反,大部份係名牌嘅衣服鞋襪,咁顯然女兒過於注重外表,忽略咗內涵。又或者清單偏重玩具或電子消閒產品,小朋友係咪放太多心思喺玩樂方面?之後,仲可以將近幾年嘅清單放埋一齊比較,會發現佢哋思想同喜好嘅轉變。

萬一發現仔女有以上值得關注嘅地方,千祈唔好直斥其非,否則以後都冇得交流。紫晶有以下幾個建議:

物盡其用:發掘禮物更多功用和益處,提升價值,例如老公話後生嘅時候睇街頭漫畫,除咗消閒,亦可用嚟做深入討論嘅題材,仲啟發咗佢好多人生道理和領悟。

善用資源:父母可以設定一個買禮物嘅金額,鼓勵仔女在預設金額內購買最多嘅禮物,可以教佢地格價方法,或建議買二手物品,教佢地如果禮物保存得好,日後仲可轉售,總之睇吓一蚊可唔可以當兩蚊用。

自食其力:揀選一啲價錢比較貴嘅禮物,鼓勵仔女自己想方法賺錢購買,例如主動幫忙做一些額外嘅家庭雜務,又或者好似紫晶認識嘅一啲中學生,自己製作毛公仔同精品擺上網賣。

最後,記得保留清單,一年半載後攞返出嚟,小朋友可能發覺本來好渴望得到嘅禮物,已經唔再渴求,呢個時候就係教佢哋認清楚want 同need嘅分別,同埋消費前要考慮清楚,唔好衝動。

李紫晶PROFILE-PIC
李紫晶PROFILE-PIC
撰文:李紫晶
40幾歲土生土長,經常笑口常開嘅樂天派師奶,除咗食同瞓,最大嗜好係搞搞女兒嘅敎育同埋理吓財,最大幸福感亦係要財政無憂加女兒品學兼優。李紫晶將用心跟讀者分享親子理財,激勵大家靠自己創造樂融融的美好生活。

 

📣相關閱讀
▸ 虛則實之的教育方法  http://bit.ly/2O0cnsL
▸ 學習加減運算 從沒有數字開始 http://bit.ly/2NW6aOx
▸ 求學經費大貶值?http://bit.ly/2PmjTjt

 

想知更多育兒資訊 請留意Easy Pama

其他內容