【生個妹妹做禮物?】2歲小海綿生日 Angelababy被網民催生

(網上圖片)
(網上圖片)

楊穎(Angelababy)15年同黃曉明結婚,前年更榮升人母,為老公誕下得意囝囝小海綿,今日係小海綿2歲生日,凌晨12點幾,Angelababy已經急不及待,喺微博貼上為囝囝慶祝生日嘅照片,還開心留言﹕「兩歲啦」!黃曉明除咗喺老婆嘅貼文,留下勝利手勢貼圖回應,亦有轉載囝囝慶祝生日照片,唔少網民都有喺Angelababy微博留言,為小海綿送上生日祝福,同時催促Angelababy同黃曉明,要快啲生一個小公主,畀小海綿做哥哥。

Angelababy曾經講過唔會主動將小海綿樣子曝光,等佢長大後自己決定,加上黃曉明曾經因為被傳媒拍下囝囝正面照而嬲爆,故Angelababy今次亦貫徹始終,只上載一張用高角度拍攝囝囝照片,照片中可見小海綿遺傳咗爸爸基因,擁有一頭濃密頭髮,而佢頭上就戴咗一個用金色咭紙做嘅皇冠,配襯一件黑色西裝,仲打埋煲呔仔,坐喺一張掛滿金色同紅色絲帶嘅BB座椅上,前面仲有人為佢遞上小蛋糕,相信Angelababy噚晚已經為囝囝慶祝生日。

而下個月就「轉字頭」30歲生日嘅Angelababy,早於去年已表示同老公都有計劃多生一個,因為老公講明想多要一個女兒,佢亦希望湊成一個「好」字,但一年過去,生B計劃似乎仲未有聲氣,唔知兩公婆因為工作太忙,連「造人」嘅時間都冇,定係計劃有變呢?!

今日係小海綿兩歲生日(網上圖片)
今日係小海綿兩歲生日(網上圖片)
Angelababy上年已經話想同老公黃曉明生多一個女。(網上圖片)
Angelababy上年已經話想同老公黃曉明生多一個女。(網上圖片)
Angelababy不時會貼出親子相,但都係冇囝囝個樣。(網上圖片)
Angelababy不時會貼出親子相,但都係冇囝囝個樣。(網上圖片)