【當時唔太熟】秋生遭第三者抱子挾迫 雯女被call到場:見佢爆晒缸
忙緊拍《婚內情》嘅鄧萃雯,今晚到灣仔出席一個頒獎禮。雖然忙於開工,但連日有新聞關於佢,一單係與黃秋生有關,另一單係關佘詩曼事。
早前黃秋生接受車淑梅電台節目訪問時,談到20多年前與岑建勳外甥女有婚外情,一日女方更抱著兒子,謂要送番俾秋生。「我抱BB返屋企,三分鐘之後佢又返轉頭要抱番個仔,仲打爆我副眼鏡。我見BB塊面有血,以為個仔出事,即刻將佢趕走,後來先發現係自己流血。」事發後,黃秋生馬上通知鄧萃雯,雯女趕了過來,見證了當時的情景,也大吃一驚。
二十年的事,黃秋生仍歷歷在目,雯女也記得清清楚楚,她謂:「係啦!我當時都嚇親。其實嗰陣唔係識咗秋生好耐,見到佢爆晒缸,都唔知乜嘢事。」
雯女謂經過嗰件事之後,兩人成為好朋友:「佢大男人嚟0架嘛,竟然俾我見到佢軟弱一面。」友情一直keep到依家,雯女受浸時,亦有邀請秋生觀禮。「之後我叫自己做『鄧姑娘』,嗌佢做『黃小朋友』,為佢做過好多輔導,有好多時見佢喺痛苦嘅時候求救,知道佢都有迷惘期黑暗期,有唔開心嘅時間,我會為佢祈禱。早個幾月前見過秋生,知道佢媽咪唔係太舒服。」