【百老匯電椅中心】可能係最好睇嘅Spider-Man? 《蜘蛛俠:跳入蜘蛛宇宙》

蘋果動新聞
可能係最好睇嘅Spider-Man? 《蜘蛛俠:跳入蜘蛛宇宙》
可能係最好睇嘅Spider-Man? 《蜘蛛俠:跳入蜘蛛宇宙》

恕鄙人腌尖腥悶 —— 至今未有一套蜘蛛俠電影完全滿足到我。

由16年前Sam Rami執導第一部《Spider-Man》計起,呢位爬牆英雄做主角嘅電影已經有7套咁多,只可惜每套都硬係有瑕疵,令我呢個蛛迷又愛又恨。

「為蜘蛛俠電影驗屍」
先講Rami操刀嘅三部曲。Let’s be honest: 02年首作推出之際,超級英雄片正值冰河期,難得忽然有套荷里活A級製作,擔大旗嘅仲係Marvel台柱,好多漫迷、影迷都加晒感情分。依家睇返,《Spider-Man》其實幼稚到令人尷尬:唔知係導演問題吖,定男主角Tobey MaGuire本身問題, 由佢演繹嘅Peter Parker成身肌肉,但智力發展就停留喺學前階段;睇住佢戇膠膠咁嘅樣唸對白,簡直係一種折磨。大佬呀,彼德柏加係毒L、係不擅交際,但唔係撼親個腦吖嘛!問心,你能夠相信呢條友同Kirsten Dunst飾演嘅Mary Jane一樣係高中生嗎? 我就覺得佢似讀特殊學校多啲。論劇情,Rami系列似乎停留喺唔睇漫畫嘅人對超級英雄故仔嘅印象 —— 簡單、公式化,人物描寫紙咁薄,有啲似睇教育電視。唯一例外係第二部曲, 蜘蛛俠同八爪魚博士嘅正邪對決至今依然係英雄電影嘅示範作。至於故事散到一地都係嘅第三集,就無謂提嘞。

2012年,Sony Pictures開創屍骨未寒就reboot嘅風氣,將蜘蛛俠系列推倒從來 (Rami三部曲最後一部都只不過係07年嘅事)。觀眾對呢套《Amazing Spider-Man》反應一般,不過我本人其實幾喜歡:首先,嗰套暖水袋質感嘅蜘蛛衫設計前衛,雖則有褻瀆原作之嫌,但起碼夠膽試新嘢,同蜘蛛俠嘅怪異形象亦出奇脗合。其次,導演Marc Webb顯然有落過功夫,研究漫畫入面蜘蛛俠嘅動靜;呢點從佢搵Andrew Garfield做男主角可見一斑。照常理,Garfield身高1米79,手長腳長連頸都長過人,點睇都唔似彼德柏加。嘿,點知佢一著起超人衫,古怪甫士多多擺得出,彷彿演緊荒木飛呂彥嘅《JoJo奇妙冒險》。呢啲跨張嘅形體動作正正係原著特色所在,而Garfield 嘅演繹亦係至今幾任男主角中最有味道。加上Marc Webb塑造嘅Peter Parker似返個正常人,比起前作仲加添一份年青人嘅反叛,成功擺脫Rami系列稚氣。套戲顏色運用亦相當出色,攝影師John Schwartzman用強烈暖色系襯托藍天白雲,將紐約拍得有mood又有漫畫感。可惜《Amazing Spider-Man》故事流於平板,奸角蜥蝪人又欠缺魅力,未能成為大作。最唔爭氣嘅,係同樣由Marc Webb執導嘅續集居然走晒樣,冇晒風格化攝影,後段同電魔決鬥嘅CG更加差到PS2都不如,睇到火都滾。該片票房失利直接令《Amazing》系列提早結束,可謂應有此報。

及至2016年,Marvel Studio千辛萬苦同Sony Picture傾掂人物版權,讓蜘蛛俠喺《Captain America: Civil War》登場,全球粉絲歡喜若狂。MCU操刀嘅新版蛛仔可以話撥亂反正:選角Tom Holland由年紀到外型切合原著形象,「毒得嚟醒目」嘅性格設定亦似返動漫迷認識嘅Parker;最重要係新版超人造型終於返樸歸真,似返大眾印象中嘅蜘蛛俠,就連眼眶部份都做返粗黑邊設計,堪稱最classic、襟睇嘅演繹。到2017年,Sony沿用MCU世界觀開拍獨立作品《Spider-Man: Homecoming》,眼見演員、造型、角色性格基本不變,影迷更加鬆一口氣。若論整體表現,《Homecoming》可以話四平八穩;部分場口,例如蜘蛛俠坐喺廣告牌食三文治,更加拍出Marvel漫畫嘅氣氛同神髓。美中不足嘅,係導演Jon Watts處理動作似乎力有不逮: 前段拍攝Spider-Man飛躍大廈之間嘅場面,欠缺前人「chok到盡」嘅有型鏡頭,動感比Sam Rami猶有不及;尾場喺客機頂同禿鷹人對打,成件事又調返轉,鏡頭又碎又亂睇都睇唔清,CG仲要跌晒watt,一味用花哩碌閃光遮醜,完全冇實感,扣分。

「最好睇嘅蜘蛛俠竟然係卡通片?」
喺全能嘅Marvel Studio協助監工底下,《Spider-Man: Homecoming》拍出嚟都只不過比下有餘,我對有生之年睇到完美蜘蛛俠電影已經死心。誰不知兩個月前睇《Venom》,竟然又令我重燃希望。

千祈咪誤會: 毒魔雖然係蜘蛛俠漫畫衍生作品,但呢部大陸騰訊有份投資嘅《Venom》粗製濫造,電腦特技比犬隻大便仲要惡劣,本人睇到爭啲割櫈 (奈何此片票房強勁,全球觀眾似乎樂於扒糞)。之所以話有希望,係因為Sony準備咗一條《Spider-Man:Into the Spider-Verse》(蜘蛛俠:跳入蜘蛛宇宙) 嘅特長預告,放喺片尾字幕後放映。喺戲院屎滾滾坐咗兩個鐘,睇得最興奮就係呢條片。

以往Marvel動畫頂多只係一般電視卡通水平,作品亦甚少喺戲院上影。今次呢套嘅主角Miles Morales仲要係平行宇宙另一個蜘蛛俠,對少留意外傳嘅觀眾照計冇吸引力。點知只係開頭兩三個鏡,全院觀眾已經精神為之一振:凌厲又富動感嘅鏡頭,高質又生活化嘅對白,一睇就知係尊重觀眾智商嘅電影。不過真正睇到合唔埋下巴嘅,係套戲前所未見嘅作畫風格:套戲用嘅明明係3D電腦技術,但睇起嚟又似用油彩繪畫嘅2D作品,而且不時出現「網點」、「音效字」等美術效果,令畫面爆發強烈嘅漫畫感。人物美術亦流露獨特嘅美漫風格,比起一般Marvel動畫嘅行貨人設,套戲嘅角色睇起嚟更加似Pixar一流作品。行出戲院再做資料搜集,先知監製Phil Lord同Christopher Miller為咗幫套戲建立漫畫味,前後總共聘用142位動畫師;淨係為咗鎖定畫風,佢地事前就用咗足足一年時間,製作一條參考用嘅10分鐘試片。如今大家睇到嘅完成品其實全部經過兩個工序:先由專人製作3D電腦,再請畫師喺電腦影象上面人手加工。

劇情方面,《Into the Spider-Verse》相信參考咗《Spider-verse》、《Spider-Geddon》兩個漫畫系列,將故事舞台安排喺由無數平行世界組成嘅「蜘蛛宇宙」。根據原著,Marvel世界無限個平衡宇宙各自住咗不同版本嘅蜘蛛俠,有男有女,有老有嫩,有古裝人亦有時裝人,甚至有啲蜘蛛俠根本唔係人類。今次動畫版本就將原著加以改編,奸角由專門獵殺蜘蛛俠嘅吸血鬼家族,改為黑幫頭子King Pin同佢嗰部破壞時空平衡嘅超級粒子對撞機。電影主角Miles無意中畀輻射蜘蛛咬到,成為新一代蜘蛛俠,嚟自另一個平衡宇宙嘅彼德柏加就充當師傅,帶住呢個徒弟同其他蜘蛛同胞,迎戰超級大鑊嘅時空危機。

《Spider-verse》原著入面出場嘅蜘蛛團隊人多勢眾:包括嚟自印度嘅蜘蛛俠、莎士比亞年代嘅演員蜘蛛俠、參考樂隊Sex Pistol主音Sid Vicious嘅Spider-Punk等等。今次電影版已經曝光嘅,就有參考日本動畫《新世紀福音戰士》嘅Peni同機械人「SP//R」、犯罪片蜘蛛俠Spider-Noir、由Parker前女友Gwen化身嘅Ghost Spider,同真身係一隻乳豬嘅Spider-Ham等等。不過劇情重點將會落喺黑人青年Morales,同已經40歲、仲離咗婚嘅師傅Peter Parker身上。觀乎出咗街嘅幾條預告片,呢套動畫Spider-Man嘅戲味似乎比真人電影更濃郁,對親情、友情嘅描寫更細膩。而外國影評就對部戲一致好評,執筆之時Rotten Tomatoes指標更直達「100% fresh」,相當驚人! 唔少網媒更加急不及待,宣告《Into the Spider-Verse》為歷來最掂嘅蜘蛛俠電影。到底係marketing炒作還是真材實料,一星期後上畫日自有分曉。

撰文:阿雞 
《蘋果動新聞》前創作總監,文化雜食者,high嘢cheap嘢都啱,淨係冇中間。現為網台Booom主持cult片節目《百老匯電椅中心》,並負責附屬FB群組《百老匯電椅中心:放棄治療部》(broadwayelectricchair)

其他內容