【相處之道要忍讓】87年股災一夜唔見大半身家 方伊琪：我相信一定可以搵得番

入行45年的方伊琪，1978年跟音樂家謝永康結婚，婚後方伊琪家庭事業兩兼顧，即使長駐在夜總會登台唱歌，但從未被物質所引誘，日前她在北角接受訪問，談到這段婚姻，方伊琪笑說：「嗰陣有人話夜總會品流複雜，但係我真係冇見過，亦都唔會見到有所謂品流複雜嘅人埋身，反而試過喺未結婚之前，曾經有人送鑽石錶畀我，不過最後都畀番佢，我覺得如果啲做生意嘅人，去夜總會玩唔係咁好。」

雖然有不少人覺得玩音樂的人，因為生性浪漫，自然會吸引不少狂蜂浪蝶，不過方伊琪笑說：「我先生係band仔，但係佢反而畀到我穩定嘅感覺，做呢行啲人好鍾意應酬，周圍玩，但我同老公都係收工後就會第一時間返屋企嘅人，大家都唔會周圍去，作為一個太太，老公準時返屋企梗係開心啦，咁啱連我自己都係，所以當年我爸爸只係反對我入行，冇反對過我結婚，可能佢覺得呢個男人唔錯啩，安心畀我嫁，但係有朋友估我哋一年貨仔就玩完，真係要剝佢哋棚牙！」

對於夫婦間的相處之道，她說：「拍拖梗係畀最好一面大家睇，但係結婚之後，好多嘢大家都要忍讓，好似佢要忍我嘅脾氣，我要忍佢嘅唔整齊，大家嘅性格唔同，又喺唔同嘅地方出身、成長，一定會有唔同諗法同性格，所以走埋一齊係要磨合同忍讓。有人問過我哋有冇鬧過交，我老公話冇，只係俾人鬧，但係佢又覺得鬧得啱，因為有啲嘢係做錯咗。」

不過方伊琪坦言結婚多年，家庭的確曾經出現衝擊，甚至可以說是一個挫折：「嗰陣係87年，我先生去咗買股票，嗰次（股災）好得人驚，係停咗好耐先開番，開番嗰陣好多人都唔見錢，我哋一晚唔見咗80幾萬，係一層樓嘅價錢，差唔多唔見咗大半身家。我奶奶問我點解唔鬧我老公，但係我覺得有乜好鬧，都已經唔見咗，咪諗辦法再搵番，反正大家仲後生，怕乜嘢？跟住呢個咪係我哋嘅目標，繼續唱好啲歌，做好自己嘅工作，我相信一定可以搵得番，錢財都係身外物，終會百年歸老，我自己都帶唔走。」

或者因為生活平凡但穩定，所以方伊琪keep得好：「我已經登咗六喇，試過有朋友喺fb留言問我有冇突破，我咪話唔化妝上台，已經嚇死你，係一個突破。最近有個朋友傾開偈，佢係一個西醫、亦算係我哋嘅家庭醫生，朋友話最緊要夠瞓，充足睡眠係最好，如果你唔夠瞓，就算食乜都冇用，好似感冒，食咗藥都要休息，係好緊要。」她又說：「我自己比較懶惰，如果朋友鍾意煲湯，可以煲多啲魚湯，對腸道、皮膚都好好，唔使買靚魚，如果對女性，黨參、北芪，嗰啲補氣補血，再加幾粒冇核嘅紅棗，唔驚會燥，杞子就明目，我成日都叫人煲呢個湯水嚟飲，黨參有感冒都唔驚，真係有感冒就唔好落北芪。」