【真係活得唔耐煩?】 鄭嘉穎爆陳凱琳變女王 張晉：我太太有暴力傾向

張晉、鄭嘉穎、周秀娜、譚耀文、黃百鳴等，噚晚喺銅鑼灣出席電影《葉問外傳：張天志》首映禮，眾演員上台介紹角色，黃百鳴上台介紹張晉話：「拍《葉問》時，甄子丹就做咗宇宙最強，o依家最強上咗天，不食人間煙火，張晉貼地氣好多，o依家佢係地上最勁。」張晉喺台上話：「因為八爺（袁和平）要求真功夫真打，我同楊紫瓊對打，佢真係好多瘀傷。」

張晉接受訪問，問到之前笑老婆蔡少芬普通話唔好，點知激嬲老婆大人留言：「看來有人命不久已。」，張晉直言：「估唔到咁嚴重，反應咁大，呢個世界好唔公平，我廣東話咁標準，有時講錯咗一隻字都俾佢笑幾年，但o依家笑少少就唔畀，以後小心啲講嘢，唔好亂講。」

鄭嘉穎即笑話：「有時啲說話唔好喺街度亂講，不過怕老婆係會發達嘅，係有好處，但呢啲唔係叫做怕，係叫尊重，同怕好大分別。」不過張晉就好坦白：「我真係怕，冇得唔怕囉！我太太有暴力傾向。我負責送女返學，太太同車，最近接送埋阿女啲同學，五個女人一架車，我冇地位，算啦！所以拍戲時要Man啲。」

鄭嘉穎繼續搭嘴：「我唔會公開笑老婆，閂埋門係情趣 。」問嘉穎有冇試過激嬲太太陳凱琳?佢話：「當然有啦！但我唔會講係乜，係人都會有時唔覺意，有時踩到地雷就會爆㗎嘛！」太太係咪做咗女王?嘉穎坦承：「大肚一定係，激都唔敢激佢，最重要佢開心，佢開心肚入面嗰個又開心，大家就會開心，我又開心。」至於幾時公佈陀B仔定B女?嘉穎話：「我唔理，太太揸主意，佢邊日講就邊日講，唔好要我講，我好難做。」

另外，娜姐近日成立工作室，佢話：「入行十年係時候長大，試下自己發展，做自己想做嘅事，專心搵自己鍾意嘅角色，以前同公司向方一致 ，但經歷十年，自己對未來諗法有啲唔同，既然係咁就自己試下獨立，尤其經歷29+1，真係要試。」