【祖藍新搞作】無綫宣佈由《我是歌手》班底製作 與芒果TV合作《聲生不息》正式招募

今年王祖藍返回無綫任「首席創意官」，有指搞作多多嘅佢一直希望幫助大台挽回人氣及收視率。而上個月內地就傳出湖南衛視網際網路影片平台「芒果TV」會與無綫合作製作以《港樂》為主題之音樂比賽《聲生不息》，由湖南衛視從韓國MBC引進之同名大型歌唱真人秀節目《我是歌手》班底製作，無綫官方於噚日（19日）亦正式發布招募海報。

今次報名日期非常短絀，由即日至本月24日，為期少於一星期。招募海報亦列明，今次比賽活動會「聯同《我是歌手》原班人馬推廣港樂金曲」，目的係希望可以尋找熱愛廣東歌、具演唱能力、音樂創造力及舞台魅力之歌手。

今次音樂比賽除咗有表演欲嘅參賽者之外，唱作嘅歌手及現役歌手藝人亦可以報名參與！參賽者晉級後更會親身到內地會與全國選手對壘，節目實行要發掘有音樂才華而深藏不露嘅人才。另外，祖藍亦非常歡迎各位藝人歌手一齊參與，免錯失被人發掘嘅好機會，似乎係希望可以親手培育出新一代歌手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！