【絕處逢生】鬼妹仔性格成箭靶 梁靖琪:成件事變得唔討好

從前喺Google搜尋輸入梁靖琪、Toby呢啲字,你會發覺關於工作嘢係寥寥可數,反而會見到一大堆負面新聞,例如係同邊個邊個緋聞、因為老竇梁家樹呢個靠山,就算幾咁戲屎,又或者外型有幾咁唔討好,總之唔擔心會冇拍戲機會!直到Toby喺16年離開無綫,估唔到,絕處都可以逢生!

最近Toby喺網劇《蝕日風暴》裡面,飾演一個娃娃兵林音,呢個女仔可以不顧一切去保護愛嘅人,打起上嚟一啲唔錫身,好多危險鏡頭都親身上陣,最後為咗救張智霖而死,結果呢場戲感動咗唔少人,仲令觀眾對Toby有改觀,認為佢少咗當年嘅浮誇,取而代之係多咗一份踏實,演技都比當年有進步!

日前Toby喺尖沙嘴接受《蘋果》專訪,講到呢個轉變,佢話:「我以前成日話唔會俾呢行改變到我,我就係我,但係原來唔係話自己覺得OK就得,事實係有好多人,睇到第一眼就會有好多批評同意見,嗰陣俾人鬧到冇感覺,話你醜話你肥已經係好小事,其他鬧嗰啲係唔出得街,冇一套劇係唔會冇俾人話,就算係唔係真嘅緋聞,又俾人話,話到都唔知自己做緊啲乜嘢,對自己冇晒自信心,冇晒方向,無論好勤力點樣做都冇用。」

Toby仲話:「嗰陣係好唔開心,真係太多嘢發生,我仲同朋友話冇得返轉頭,人哋永遠都係咁睇我,我都有問過自己仲做唔做呢行,反正我都唔討好,不過人係要有轉變,由唔敢聽到去聽啲批評,覺得係要長大,係咁某啲嘢被人誤會?又或者係好多以前嘅嘢扣咗分?可能真係喎,試過有人話唔好再話係一個鬼妹仔,呢個唔係一個藉口,原來係呢種性格累事,令到成件事變得唔討好,咁真係要去改,如果連我自己都唔救自己,冇人可以救到我。」

結果Toby離開TVB,選擇離開目的是希望給一個機會尋找自己:「我開始去健身,去做wedding planner,開始改變自己生活、思想同狀態,呢段時間嘅努力係會令人改變。我諗係有一個健康嘅生活同心態走咗出嚟。好感謝身邊嘅人俾機會去重新睇我。o依家人大咗,無論係事業或者係感情上,令我轉變咗多,更加識得處理某啲角色,最重要係冇咗『你係梁家樹個女』,要點樣點樣嘅負擔,真係冇咗,喺呢段時間,我放低咗一啲嘢,原來放開咗係咁舒服。」

問到乜嘢原因令佢放低枷鎖,Toby話:「講真,有邊個就算爸爸媽媽做呢一行都可以好犀利?其實壓力係更加大,我永遠都係梁家樹個女,永遠都有以前嘅嘢,我都唔知係乜嘢原因,突然間get到啲嘢,學識俾一個機會自己。」Toby仲話好多謝林音呢個角色:「其實佢有某啲位好直,好似我本人,開頭我俾自己好大壓力,睇過好多戲去參考,不過之後跟武師學嘢,Tune咗自己,好快就入戲。我天生唔係演員,又冇演戲細胞,只係好鍾意做戲,如果冇經歷過呢啲嘢,係唔會有今時今日。」Toby又話:「好開心話有朋友做得好,連我家姐都話OK。」

唔知爸爸會唔會開心見到呢個轉變?Toby笑笑口話:「唔知呀,不過我相信任何父母都唔想見到仔女有負面新聞,到呢一刻佢哋會好開心,聽到有人讚,爸爸會喺個心笑出嚟,有人認同自己個女喎,可能喺呢10幾年嚟,冇人覺得我真係好喎,當唔好時候,做乜都唔好,到今日有少少認同,好感觸。」

採訪:何慧斯
髮型: Michael Lam @Beijing hair culture
化妝:Frances Ho
場地:My Day-My Seasons 四季薈

攝影:沈健程
攝影:沈健程
Toby曾經為負面新聞迷失自己。
Toby曾經為負面新聞迷失自己。
Toby感謝林音呢個角色,令到佢俾觀眾有改觀。
Toby感謝林音呢個角色,令到佢俾觀眾有改觀。
聽到有人讚個女,相信梁家樹覺得安慰。(資料圖片)
聽到有人讚個女,相信梁家樹覺得安慰。(資料圖片)
Toby:「我以前成日話唔會俾呢行改變到我,原來唔係話自己覺得OK就得。」
Toby:「我以前成日話唔會俾呢行改變到我,原來唔係話自己覺得OK就得。」
Toby仲話:「嗰陣係好唔開心,真係太多嘢發生。」
Toby仲話:「嗰陣係好唔開心,真係太多嘢發生。」
結果Toby離開TVB,選擇離開目的是希望給一個機會尋找自己。
結果Toby離開TVB,選擇離開目的是希望給一個機會尋找自己。