【老戲骨演乜似乜】又係御用工人又係武林高手 81歲梁愛最經典被周星馳篤爆偷鮑魚
從演超過半個世紀的81歲資深演員梁愛,是「御用工人」,也是「武林高手」,做過《天龍八部》四大惡人葉二娘,也做過《倚天屠龍記》靜迦師太。
愛姐日前接受《蘋果》訪問時話:「我不嬲冇拍武俠片,好攰,嗰陣蕭笙叔嚟咗TVB,蕭笙叔同我先生左几係friend,佢話四大惡人啱愛姐做,我望吓佢,佢第一套,做囉。《天龍八部》搶人啲仔、吸人啲血,抱住個o靚仔通山走好鬼辛苦,抱完返嚟攞杯嘢飲都手軟,嗰時後生,你o依家叫我執一千萬我都唔得閒同你執呀。」
愛姐擅演女傭和小人物,《風雲》中與譚炳文飾演的大陸新移民夫婦,又或是《抉擇》中的水上人,愛姐都演得入木三分。
「其實睇你投唔投入角色,做演員最緊要體驗,體驗人哋生活,我哋以前都請過馬姐,所以我做《狂潮》就手到拿來。好似拍《抉擇》做蜑家婆,我去碼頭踎咗成個禮拜,睇吓水上人點樣過日子。」
愛姐最令人深刻的演出是《他來自江湖》中飾演黃秋生女友梁芷珊家的管家,戲份雖然不算多,但跟周星馳(星爺)多場鬥氣場面,包括扮盲摑星爺一巴,或是遭星爺踢爆偷事頭婆梁芷珊鮑魚等等,幕幕也十分精彩。
愛姐說:「大多數周星馳度出嚟,佢話:『愛姐你可唔可以咁?』梗係可以啦,我係演員嚟㗎嘛,佢叫我死我都死得㗎。如果係一個演員,應該乜嘢都做得,唔係化妝講故咁簡單,你明唔明乜嘢叫化妝講故?即係化咗個妝喺度講故仔,冇料到。我唔係化妝講故嘅人,我做任何一個角色我都有考究,去體察民情,俗語話空槍上陣, 我唔會做呢啲,即係百無,將個腦擺低喺屋企,剩係帶個pat pat返工。」
別以為演女傭行行企企十分輕鬆,愛姐坦言壓力不少:「真係唔使記咁多對白,不過有時都好辛苦,人哋幾頁紙,你忽然間攝一句落去,你NG,你仲唔撼頭埋牆?唔係話講得多有鑊孭,講得少仲孭得重。」
愛姐每想起那些年拍劇日子,便感到十分開心,跟一班演員猶如一家人。「尤其是我見到阿Ken(曾江)更開心,如果見到謝老四(謝賢)更加開心,佢成日都話:『乜你仲未死呀?』我話:『梗係你死先㗎啦,你都唔死,我點敢死呀?』」
過去10年,愛姐因健康問題甚少參與幕前演出,僅於2015年為梁健平主演的其中一集《獅子山下》客串,近日香港電台邀她拍攝一個關於腦退化老人家的劇集,愛姐戲癮發作,一口答應。她笑言:「近來身體唔好,諗住嗰個都係我遺作。」