【聲夢演唱會】炎明熹粉絲排隊上前獻花 網民嚇親：農曆七月搵啲咁嘅嘢玩

無綫歌唱比賽節目《聲夢傳奇》早前已經選出冠軍，無綫食住個勢幫一班聲夢學員籌辦四場《聲·夢飛行First Live On Stage》演唱會，演唱會門票開售好快售罄，真係一票難求。演唱會喺星期日已經順利完成，冠軍炎明熹（Gigi）表示唱到第4場時差唔多失聲，一直受失眠困擾，好彩姑丈同佢去跑步，維持體力，屋企人又買保健品幫助佢入睡，不過要求高嘅Gigi覺得自己表現唔係好好，只有50、60分。

不過Gigi一班粉絲仍然好支持佢，演唱會完騷都堅持等埋見佢一面，佢哋仲以好特別嘅應援方式支持，佢哋穿上fans club白色T恤。之後，粉絲們一齊清唱《喜歡你》，再逐個上前獻上粉紅色及白色花畀Gigi。唔少網民都話「農曆七月搵啲咁嘅嘢玩。認真大吉利是」、「唔好怪我咁講，Gigi啲fans好似拜山咁…」、「成班人咁唱歌好似喃嘸佬打緊齋。」、「好似係墳頭一人放低一支花拜山咁」及「鬼節送白花咁反高潮。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！