【藍潔瑛逝世】欺人太甚!秋生斥製作人借藍潔瑛抽水:未收錢梗係唔開工!

圖中為《半生緣一世情》製作人周遊。
圖中為《半生緣一世情》製作人周遊。

黃秋生今日喺油塘,拍攝ViuTV新劇《理想國》其中一個單元,扮演監犯,一人獨腳演45分鐘戲份。談到近排相繼有人離世,黃秋生亦有留意,佢表示金庸只睇對方嘅小說;至於鄒文懷,秋生稱以前曾加入嘉禾,但「只係行過見過吓鄒生」。

至於藍潔瑛,秋生表示不認識,但他對於台劇《半生緣一世情》製作人周遊日前稱,藍潔瑛係佢最怕嘅演員(新聞連結:

https://bit.ly/2zy6LRw

),秋生就忍唔住要為藍潔瑛發聲。

秋生表示︰「藍潔瑛我就有嘢講,有個製作人出嚟抽人水,數人哋以前收工後要返酒店。收工唔返酒店、唔通喺現場瞓咩?收工大霧,要人喺車前指路,咁即係話酒店好近,如果返酒店兩個鐘頭車,唔通嗰個人喺前面指路兩個鐘咩?酒店咁近,點解唔可以返酒店?點解喺你間房度瞓?你話佢(指周遊)係咪傻傻地?又話人哋未收錢唔開工,未收錢梗係唔開工啦!你都黐線!茶餐廳咩食完先俾錢?呢啲人衰格到不得了!」

秋生認為,死者已矣,為何仲要借死者抽水。他又稱自己處於半退休狀態,冇乜機會遇到呢啲衰人︰「出嚟係搵食,收到錢咪開工,條數拖成個月,一陣又話寫錯票,一陣又話唔知匯去邊,又話老闆未番,好多呢啲理由,次次理由都係唔俾錢,以前成日有人拖數,可以問吓Do姐(鄭裕玲)俾幾多人拖數?成行都係拖數!未收錢梗係唔拍,現場即停,我試過12點收唔到錢就停工。」

秋生認為藍潔瑛完全冇問題,「收工係要車人返酒店,人人住嗰度我就要住,老闆住嗰間房,不如你入去瞓咪戇居。呢啲條件,人哋嚟拍之前傾好晒,咁你又應承人。我唔相信藍潔瑛突然話要住五星級酒店,我唔信,真係欺人太甚。」

「點解仲要咁欺負人到幾時,應該要有同情心,仲講埋呢啲嘢,仲要唔係道理,阿婆跌喺度都走去扶吓啦,就係咁簡單。」佢更謂自己已半退休,得罪人都唔驚。

至於講到ViuTV新劇《理想國》,秋生就話:「幾得意,一個人做晒,舞龍舞鳳得自己,喺監獄入面,題材又得意有趣,本來仲叫我做多個單元,我睇過劇本唔啱我,太後生仲要同個靚女做,愛情戲唔識做。」

「有難度,好甘,又要連殼食鷄蛋,對白又自己對自己講,都有把聲,由副導演講,情緒又高高低低,(難唔到你?)難到,真係唔識做,我驚觀眾唔夠三分鐘熄機,影帝?我好耐冇做影帝,我呢啲退役啦!影帝,掉晒去堆填區,(會唔會再繼續再攞影帝?)唔好啦,算吧啦!俾吓啲新人,郭富城嗰啲新晉影帝,如果我出嚟,俾我又唔係,唔俾我又情何以堪呢,算啦!我自己同自己鬥算啦,好似呢套惟有自己舞。」

攝影:羅慧敏
攝影:羅慧敏