【話緊邊個?】蕭正楠指唐詩詠自爆婚期唔出奇 曹永廉:啲人結咗婚都唔出聲

蕭正楠指唐詩詠自爆婚期唔出奇 曹永廉:啲人結咗婚都唔出聲
蕭正楠指唐詩詠自爆婚期唔出奇 曹永廉:啲人結咗婚都唔出聲

曹永廉、蕭正楠同梁嘉琪今日喺油塘出席嘉年華,阿廉同阿蕭喺訪問中,不時互窒,笑料百出,講到佢哋近排經常合作,有人笑佢哋今日係情侶檔搵錢?點知阿廉話:「我失咗戀啦!大家都睇到㗎,交畀翠如啦,我都玩夠!」阿蕭笑指:「佢都鬆晒,我指佢啲皮膚,其實好開心,『老廉蕭騷』(曹永廉、蕭正楠嘅組合名)明年4月喺美加開買飛演唱會,都大型㗎,容納到3、4千人。」阿廉即刻話:「一般啦,我唱開萬幾人嗰啲,同埋你練吓歌先啦!」

問佢哋兩個會唔會搞埋棟篤笑?阿廉表示:「未諗,到時先,不過我哋喺台上都係亂嚟,其實同佢一齊都有好多合作,但係爭個廣告。」問佢哋會唔會想拍前列腺廣告?阿蕭望望阿廉嘅髮型就話:「你哋睇佢髮線咁高就知佢想拍海狗丸啦!之前姚子羚送咗成人紙尿片畀佢,我覺得好啱做代言人。」阿廉話:「你幫我換囉,大家睇住海報都覺得溫暖。」

講到阿蕭同老婆黃翠如婚後第一個聖誕節,阿蕭指今日要開工,但日前已經開咗party慶祝,有冇交換聖誕禮物?佢話:「唔使啦,其實今年都已經好sweet。」

提到唐詩詠喺Instagram上載一張有佢自己、黃翠如、C君未婚妻黃天頤同一位圈外朋友嘅合照,並留言「下年呢個時候,就變成有3位可愛人妻。」因此有傳唐詩詠自爆明年結婚,阿蕭話:「似喎,唔出奇。」阿廉即搭嘴:「係呀,啲人結咗婚都唔出聲,唔講都唔知。」

此外,梁嘉琪透露今日病住開工,「今年冇病過,點知衰收尾,陣間收工都返屋企瞓,唔去玩。」有冇男士約?佢話:「有,周公陪我。」

曹永廉(右)同蕭正楠今日「情侶檔」現身商場活動。
曹永廉(右)同蕭正楠今日「情侶檔」現身商場活動。
梁嘉琪透露今日病住開工
梁嘉琪透露今日病住開工