【離巢真相？】簽約蕭定一3年得一套戲 胡杏兒決定約滿自組公司

胡杏兒婚前為事業搏到盡，上位做咗大台當家花旦，喺《2011年萬千星輝頒獎典禮》憑劇集《萬凰之王》登上視后，同時再憑劇集《怒火街頭》奪「我最喜愛電視女角色」，一晚再得由全港市民投票產生嘅「非凡風采女藝員」獎項，，破天荒成為「三料視后」。

杏兒15年約滿大台，佢決定向外闖，大鑼大鼓簽約蕭定一旗下嘅中國3D數碼，主攻大陸市場同拍電影。同年杏兒嫁咗畀做生意嘅李乘德（Philip），婚後繼續為演藝事業搏殺，不過佢入咗蕭定一公司快3年，仲就嚟約滿，今日傳出佢唔再續約，打算約滿後自組新公司「東方新星」，有指佢喺觀塘搵埋office，促勢待發。

《蘋果》收風杏兒唔單止想自由啲，隨時再追番個女，同囝囝李奕霆（Brendan）湊成好字，據知主要係佢覺得呢3年發展未如佢理想。當日杏兒肯由大台因呢個搖籃離開，因為佢相信自己實力可以向影圈開拓新發展，蕭定一公司都開唔少戲，其實大家真係好多合作空間，可是杏兒簽約呢3年，佢拍大陸劇多，蕭定一公司開好多戲都未有啱角色預杏兒，加上佢舊年宣布陀B，懷孕到生仔呢段時間都減少咗工作，當杏兒產後復出，早排先獲安排拍咗同古天樂、吳鎮宇、張智霖主演嘅電影《死亡通知單：暗黑者》，電影主線都係男仔戲。即將約滿，難怪杏兒心灰意冷自組公司，自由度真係可以大好多，起碼自己話晒事。

杏兒升呢人妻，為李家生咗「慈枯椗」，老公Philip錫到燶，Philip好支持杏兒任何決定。有指Philip喺今年4月一擲$2800萬買入大埔聚豪天下嘅2800呎獨立屋，諗住屋企空間大咗，咁生多幾個都冇問題。