【離離合合】宣佈離婚2個月後與「丈夫」返愛巢 張雨綺袁巴元疑似復合

曾經拍過周星馳《長江七號》同《美人魚》嘅32歲星女郎張雨綺，15年同第一任丈夫王全安離婚後再喺16年嫁畀袁巴元，仲為袁巴元生咗對龍鳳胎，一家四口本來好幸福。不過，今年9月張雨綺突然被爆喺9月24日中秋節同丈夫袁巴元爆發肢體衝突，張雨綺仲攞生果刀劃傷對方，警方列作家庭糾紛處理。事隔幾日，張雨綺經理人喺微博代張雨綺公布離婚聲明，並否認張雨綺同老公因財失義。

直至今個月初，有網民喺上海思南公館見到張雨綺同袁巴元手拖手行街，由於張雨綺離婚後同一對仔女依然住喺思南公館，因而傳出張雨綺同袁巴元復合。

估唔到事隔多日後，又有大陸傳媒影到張雨綺同袁巴元一齊，張雨綺今個月22號喺上海出席一個品牌活動後參加宴會後酒會，原來袁巴元都喺現場，兩個人前後腳搭電梯，大約晚上10點酒會結束後， 張雨綺被影到同袁巴元一齊離開，然後上咗張雨綺部車直駛去思南公館，之後袁巴元都冇見離開，令人對佢哋復合傳聞深信不疑。新浪娛樂曾經就呢件事向張雨綺方面工作人員求證，但對方即刻掛斷電話冇回應。

網上有知情人仕爆料，話張雨綺同袁巴元離婚可能係迫於無奈，因袁巴元曾簽下600萬人民幣賭債，又多次被爆拖欠員工工資，所以離婚可能係為咗保護妻女。