【零緋聞·好男人】結婚紀念日 林嘉華：34年前的承諾，我倆到今天仍然堅守！

61歲嘅林嘉華與曾任職無綫服裝部主管嘅太太劉寶珍，於公司邂逅，84年結婚，婚後育有一子林政峰。當年嘉華為讓兒子有更佳成長及學習環境，舉家移民多倫多，佢亦甘願做太空人，經常返香港拍劇搵銀，但與太太感情一直恩愛，從來冇傳過緋聞，非常難得。

嘉華身邊有位賢內助，當然不愁寂寞，原來今日係佢哋結婚34周年紀念日。嘉華今日喺ig貼出合照，因為嘉華要趕返香港工作，所以提早慶祝食燭光晚餐，當然唔少得送花，嘉華留言：「34年前的承諾，我倆到今天仍然堅守！多謝太太一直支持及無盡嘅付出！Thank you very much… LOVE YOU.」。

嘉華曾經講過一直當老婆係女朋友，太太劉寶珍亦冧爆留言：「Our 34th Anniversary on this wonderful journey we share … time may change a lot of things in our lives, but one thing it can never change is my love for you …… hubby thank you for everything.」唔少網民都讚嘉華係好老公，陳志健亦留言講恭喜。

另外，嘉華仲貼咗一張佢同太太嘅「Q版畫像」佢話﹕「非常開心收到一位可愛及很有才華fans的畫作 , 每年我們生日或結婚纪念日都不忘送上她自己制作的「Q版我俩」來祝福！我同太太都衷心感謝。」

嘉華今日接受《蘋果》電話訪問時話﹕「相處之道好簡單，第一要企對方角度諗嘢，我成日都話性格等如手指模一樣，好多人話要性格磨合，係同意嘅，磨合者要雙方了解對方性格，所以思維都要用對方角度去諗，多面體差好遠。同埋要尊重對方，同俾各自空間，生活上就增加多啲情趣。」問到送乜禮物？佢笑笑口話﹕「禮物一早送咗，當34周年結婚周年紀念禮物，係一隻鎖住佢嘅手鈪。」