【電影LOL】《蜘蛛俠:不戰無歸》預告片流出 電影公司補鑊推官方版出場 亮點有呢幾個!

·3 分鐘文章

《蜘蛛俠:不戰無歸》(Spider-Man: No Way Home)幾個鐘頭前爆咗條未經後製、打哂水印嘅預告片,話哂Marvel第4階段喎,就算寫住「公司內部參考用」流咗出街就當然被瘋傳,可能見同社交媒體投訴勁block啲片都無用,Sony唯有正正經經嗱嗱淋放條做好哂後期嘅預告片出嚟。

由導演鍾華斯(Jon Watts)執導的《蜘蛛俠:不戰無歸》(Spider-Man: No Way Home)嘅傳聞都幾多,好似演員陣容、劇情發展、有要角會死等等,預告片終於確認咗幾個細節!承接上集,Peter「蜘蛛俠」身份曝光令佢面對極大壓力,所以決定搵由Benedict Cumberbatch飾演嘅奇異博士解救,又因為繼續口多搞住博士施咒,意外開啟多元宇宙!

傳聞中嘅「奇異博士」會出現之外,傳咗好耐嘅「蜘蛛俠」三代同堂都似有機會成真!預告片透露唔少歹角訊息,首個佈嘅歹角係由Alfred Molina飾演嘅「八爪魚博士」,佢首次喺2004年第一代「蜘蛛仔」Tobey Maguire主演嘅《蜘蛛俠2》中登場。今次Alfred回歸,利用電腦特效回春,再次飾演「八爪魚博士」!

預告片仲透露另外2位歹角,一個係由Jamie Foxx飾演嘅「電魔」,佢之前喺「二代蜘蛛仔」Andrew Garfield主演嘅《蜘蛛俠2:決戰電魔》中出現,雖然得一秒過鏡Sony又無正式確認,不過Jamie Foxx自己親口認咗,仲講埋佢今次會轉新look,唔再係藍色!

另一位會出場嘅係「綠魔」,預告片中剩係見到個招牌炸彈同奸笑聲,無見到個樣,不過又係一早知Willem Dafoe將會再次飾演「綠魔」。佢係2002年首集《蜘蛛俠》入面嘅大奸角,當時勁重戲份!

依家確定第一代、第二代「蜘蛛俠」死對頭會喺Tom Holland飾演嘅第三代《蜘蛛俠:不戰無歸》中登場,多元宇宙照理係咪都會有幾個「蜘蛛俠」先,相信fans等睇下一波預告,確定「蜘蛛仔」三代同堂!

呢個綠波波原來好關鍵!
呢個綠波波原來好關鍵!

今年 Q4 MCU 都幾忙下,9月上《尚氣》、11月到《永恆族》,《蜘蛛俠:不戰無歸》接住上12月聖誕檔,追返哂之前疫情停滯嘅進度!未知今次預告片意外流出事件真係人為失誤定宣傳技倆,一日洗足2次版,搶哂即將上映嘅《尚氣》嘅風頭。不過肯定《蜘》贏哂話題,票房爆硬!

更多電影文章

【電影LOL】今期睇咩戲 怒火/回憶潛行/汪汪隊立大功大電影/蠟筆小新劇場版/千年一問

【電影LOL】Netflix邀曾國祥執導 《三體》有幾難拍?睇呢三點

【電影LOL】《梅艷芳》預告片演員陣容曝光 未見曾志偉吳若希出場

【電影LOL】Wes Anderson新片Scarlett Johansson四星列陣 點解考起迪士尼?

【電影LOL】《男兒當入樽》電影版再有消息 下年秋季日本上映

【電影LOL】迪士尼改發行模式 當《尚氣》白老鼠?男主角劉思慕公然爆粗頂撞老細 或另有原因

【電影LOL】Disney+ 正式登陸香港 11月有得睇

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能