【電影LOL】奇洛李維斯創作漫畫BRZRKR大賣 Netflix扑鎚拍成電影搵奇哥孭飛

·2 分鐘文章

奇洛李維斯出名心地好又勤力,從影以來專心做自己,男神地位無可取替,工作量有增無減。舊年奇哥跨足到漫畫界,同BOOM!Studio合作推出由佢親自構思及創作嘅漫畫BRZRKR,奇洛李維斯搵埋《紐約時報》暢銷作家Matt Kindt齊齊度故事,由漫威畫家Ron Garney負責(曾參與《美國隊長》)構圖。

雖然奇哥係漫畫界初哥,不過名氣加上好嘅創作團隊,一套12集嘅BRZRKR初版大賣61萬本,刷新銷量紀錄!今日Netflix宣布即將推出真人版電影及外傳動畫劇集,奇洛李維斯出任電影監制及男主角!

漫畫BRZRKR主角係一位8萬歲嘅半人半神,見盡世間變化,受詛咒嘅佢受暴力吸引只能不停殺戮,但係長生不老令佢極為痛苦,只好同美國政府達成協議,為其執行極危險非人任務,美國政府則幫佢尋找身世之謎及終結不死嘅方法。

BRZRKR主角以奇洛李維斯為原型創作,由外型到設定都同奇哥有關,電影版男主角非奇洛李維斯本人莫屬!BRZRKR漫畫非常血腥暴力,《殺神John Wick》拍埋去都覺得小兒科,如果如實拍成電影都幾震撼!

睇得出Netflix對奇洛李維斯好有信心,一口氣開拍電影及外傳動畫劇,奇哥亦相當投入,做電影男主角之餘仲會幫動畫版配音。Netflix早前推出過類似嘅故事《不死軍團》,講述Charlize Theron飾演嘅Andy同樣有不死能力,幾千年嚟暗中保護人類。

《不》有大量動作場面,血腥得嚟又未至於令人不安,電影於平台推出時反應良好。有《不》嘅經驗,Netflix絕對有能力將動作、血腥暴力場面再去盡啲。或者可以嚟個crossover,當BRZRKR遇上同樣不死嘅Andy,發展埋感情線!

更多電影文章

【電影LOL】內地翻拍《秋田犬八千》八千變八筒 網友mean問︰馮小剛演八公?

【電影LOL】唔係《12夜》續集 《12日》敲定鄧麗欣馬志威主演

【電影LOL】今個星期睇咩戲 《小飛俠與愛麗絲:魔幻奇緣》《呃love天團》《末世戰疫》《入住兇宅請敲門》

【電影LOL】《尋秦記》電影版預告 影視展率先曝光 古天樂旗下天下一超多新作

【電影LOL】奧斯卡提名公布 《少年的你》爭國際電影獎 《Do Not Split不割席》入圍最佳紀錄短片

【電影LOL】Hello Kitty進軍荷里活大電影 搵動畫界高手撐起編導

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!