【韓流】《RM》今年兩度襲港 劉在錫玩轉港九嘆美食
韓國人氣節目《Running Man》(RM)不時都會去外地取景,節目之前已來過香港進行拍攝,今年4月劉在錫率全昭旻和楊世燦,以及女嘉賓姜漢娜秘密襲港拍攝。
唔知係唔係對香港情有獨鍾,《RM》噚日又被港迷發現突襲香港,今次陣容就有劉在錫、全昭旻同池錫辰,佢哋三位成員聯同攝製隊就喺尖沙嘴進行拍攝。噚晚有唔少網民都目擊劉在錫等人喺尖沙嘴某餐廳內進行拍攝,劉在錫等人亦有品嚐地道美食,唔少途人見到劉在錫等人都十分興奮,爭相圍住拍照,場面好熱鬧。
而今早再有粉絲於九龍城食早餐時捕獲到劉在錫等人,三人更大方跟粉絲合照,非常親民。之後佢哋又過咗海,去咗中環蘭香園嘆地道茶記。