【韓籍大廚主理】太子新韓屋主題複合式餐廳 大推玫瑰醬炒年糕+韓式炸雞

大南街突然多咗間韓屋？原來係集餐飲、零售，同工作坊於一身嘅韓國主題店！餐飲部分由韓籍大廚主理，主打多款韓式Fusion菜，由大家熟悉嘅韓式炸雞、紫菜飯卷，到韓國大熱嘅玫瑰醬炒年糕，坊間少見嘅韓式薄餅捲等應有盡有。亦有多款韓國直送飲品、零食等商品發售呀。

韓嘢裝修以韓屋為靈感，保留屋簷同時以落地大玻璃為門面，加上充滿現代感嘅裝修，代表兼顧傳承傳統同與時並進。真Oppa韓籍大廚Davin Kim主理嘅外賣餐飲同樣係以傳統韓國菜式、融合創意同外國元素嘅韓式Fusion菜，不時仲會有新菜式面世！

提到韓國菜當然唔少得韓式炸雞，Kim Oppa雖然唔肯透露秘方，不過就表示要做到皮脆肉嫩，一定要即叫即炸，絕對唔可以翻炸！炸至金黃色嘅外皮非常香口，就算放咗一陣再食依然酥脆唔油膩。

有甜辣、醬油同原味（$36/2件）三款選擇，甜辣醬先甜後辣非常惹味，醬油就勝在鹹甜平衡帶醬香。裡面嘅雞肉夠軟嫩，而且非常入味。

想食炸雞又有啲新意，呢個結合美式漢堡概念嘅挑戰者漢堡就啱晒喇。選用肉質鮮嫩多汁嘅雞上髀同樣生炸至皮脆肉嫩，加上自家製椰菜絲沙律、秘製醬汁（可以揀唔辣嘅原味、安心辣或者激辣）同生菜。醬汁香辣惹味非常醒胃，而椰菜絲沙律爽口帶酸可以平衡膩感，整體味道同口感層次都相當豐富。

玫瑰醬係近兩年韓國最流行嘅口味之一，唔係指用玫瑰整，而係喺韓式辣醬當中加入蕃茄同忌廉，調配成乾燥玫瑰色因而得名。就好似呢度嘅玫瑰醬炒年糕，加咗蕃茄忌廉汁之後，入口先有忌廉嘅奶香同甜味，然後辣味慢慢滲出，平時唔係好食得辣嘅朋友都絕對可以一試！韓國進口年糕口感煙韌，加埋Q彈嘅魚片魚糕同肉質彈牙嘅蝦仁，非常滿足。

以粟米薄餅包住唔同餡料嘅薄餅捲有三款口味，食肉獸可以揀呢款韓式醬烤牛肉，薄餅捲相當飽滿，餡料有牛肉、韓式烤肉醬、生菜、燈籠椒等，調味得宜，口感豐富之餘又唔會太膩。另一推介係什錦菇口味，由Kim Oppa挑選最少兩款當造菇菌加上自家菇菌汁，無肉都可以好香口！

梳打原材料都從韓國入口，柚子係最受歡迎口味之一，微甜清新。而負責人Stepanine就特別推介五味子蘇打，味道酸甜。想養生嘅話亦有五味子茶（$26），有抗老化同控血糖嘅功效唷。

負責人Stephanie表示將會同韓國文化協會等機構及商戶合作，舉辦多個韓國生活、文化工作坊，例如即將舉行嘅情人節韓式花束工作坊，亦可以舉辦K-pop偶像應援活動！

零售區有多款韓國進口零食、飲品、廚具等，部分人氣品牌更係獨家發售

韓嘢
地址：太子大南街16號大智樓地舖

文：Cathy.H
相、片：Wilfred Chui