【黃夏蕙契媽大陸遇車禍】苦主丈夫親述事發經過 不滿內地救護體制錢行先

【黃夏蕙契媽大陸遇車禍】苦主丈夫親述事發經過 不滿內地救護體制錢行先
【黃夏蕙契媽大陸遇車禍】苦主丈夫親述事發經過 不滿內地救護體制錢行先

黃夏蕙契媽馬太(Susan)年初二跟家人一行15人報團返惠州短線旅遊,不幸首天出發中午便發生車禍,馬太傷及腰部,不良於行,即日要送返港就醫,遭大陸的救護車開天殺價,行車半途又再坐地起價,才能安全送回香港,至今仍在公立醫院留醫。馬太跟不少圈中人相熟,除黃夏蕙外,方伊琪和「祥嫂」洪金梅等連日都往探望。

馬太事發後心有不甘,把相關過程上載facebook,近日片段被網民瘋傳。黃夏蕙都在fb為馬太抱不平,鬧爆大陸救護車無良開天殺價:「真係慘情!去旅行受傷,喺國內冇錢冇得醫,都唔係第一次聽到。我契媽馬太就係豬年第一個受害者,今日同祥嫂一齊去醫院探佢,希望馬太骨折快啲好番。所以,我每次出外,都叫小肥豬幫我買份保險防身。究竟是生命有價?抑或是無法無天?」

《蘋果》今日聯絡了苦主馬太,她仍留院接受治療,由她的丈夫馬先生接受訪問,他交待事發經過:「我哋兩公婆同親友一行15人,參加香港一個旅行團出發惠州,初二去到初五,我哋初二喺福田集合出發,先去東莞食飯,跟住再上車繼續行程,大約行咗一小時車,去到一條公路地上有一個氹,我同太太坐旅遊車最後一行,我哋全程有綁安全帶,但架車經過氹時,全車人彈起,我太太跌番落嚟時chok傷腰,去咗附近常平一間醫院照CP,醫院要我立即支付500蚊人民幣(約584港元)先可以照,報告出嚟話有骨折同有骨墜咗落嚟,咁太太想返香港醫,我就問醫院,佢哋話過年唔會有十字車供應呢個服務。」

醫院就建議馬生電召私人救護車服務,救護車抵達時,車上有一名司機及一名護士,馬太躺臥病床送上車,馬生續說:「我哋一早傾好話送去關口,佢哋索價3800蚊人民幣(約4,442港元),但點知行車約15分鐘,佢哋話架車只送去深圳醫院,如果要送到關口要加價,多2500蚊人民幣(約2,922港元),另外司機同護士嚟到時話新年,佢要我哋每人畀200蚊人民幣利是(約238港元),我冇理佢,只封咗一人10蚊(約11.7港元)。」對於被坐地起價,馬生當然不滿,但礙於「肉在砧板上」,只得就範。馬生說:「我哋諗住返大陸玩幾日,身上帶嘅人民幣唔多,只有3000蚊,最終要問團友借錢。」馬太上載的短片中,看到她躺臥擔架床準備過關,馬太數着一叠銀紙給內地女醫護人員支付車費,問到旅行社導遊可有幫忙?馬生更是一肚氣:「冇,佢哋話我哋有買保險,所以公司係唔會承擔所有賠償,我哋會採取法律行動。」馬生表示馬太仍要留在東區醫院臥床接受治療,至今已經留院19日,醫生指要等再出報告才決定是否要做手術。

黃夏蕙今日回應《蘋果》,她力斥大陸這種醫制非常有問題:「好彩馬生馬太買咗保險先出發,否則真係會冇命,旅行社咁樣好唔負責任,掟低團友唔理,如果身上唔夠錢,又冇親人喺身邊代為籌錢,又流緊血嘅話,肯定會流血不止死咗,返大陸有事,冇錢有病一定死得。」黃夏蕙再鬧爆那間救護車公司坐地起價:「人命嚟,點可以咁中途加價,不知所謂,令人覺得返大陸玩冇保障。」