【點解係三缺一】開騷請唔郁四哥 Joe Junior呻仲要成日被老點

Joe Junior噚晚喺灣仔伊館舉行《Joe Junior跨越半世紀演唱會2018》，林建名、梁舜燕、白茵等都有到場欣賞。胡楓（修哥）、黑妹（李麗霞）同譚錫禧則擔任表演嘉賓。

開場時，Joe Junior獻唱《Here’s a Heart》、《My Way》、《Jailhouse Rock》之後，就落台同歌迷握手，點知Joe Junior收利是收到手軟。之後就播出曾志偉、陳國燊、李克勤、羅敏莊、吳國敬、張德蘭、肥媽預先拍嘅打氣片段。

雖然全晚主打唱英文歌，但Joe Junior亦有唱廣東歌《問我》、《親情》，佢話：「我唱呢首歌就諗起一個靚女，坐喺灣仔碼頭嘅石級，我同佢講咗金句『the city is dying』。」接著就唱出《天與地》片尾曲《年少無知》。

encore時，修哥同Joe Junior合唱《錦繡前程》，呢兩位小生仲暢談當年去旅行嘅點滴，又放咗幾張相片出嚟，Joe Junior問修哥：「點解你唔幫我叫埋四哥（謝賢）嚟？」修哥笑住話：「你估咁容易請佢嚟o架，佢係無業遊民，如果佢有興趣，你唔叫佢都嚟，如果佢冇興趣，你拉佢都唔嚟。」Joe Junior又提及自己經常被修哥同四哥「點」佢去買嘢，修哥表示猜輸咗就要負責買嘢，點知Joe Junior指修哥同四哥夾埋，修哥笑指：「邊有丫！你黑仔啫！」接住佢哋合唱《Wooden Heart》同《Edelweiss》，白茵走到台邊，向修哥送上曲奇餅，最後，唔知修哥係咪唱得唔夠喉，佢要求清唱幾句《還有》先落台。

完騷受訪時，Joe Junior指上年因病而開唔到演唱會，所以今次一出台就表示好感恩。問佢係咪打算年年開？佢話：「希望在明天。」講到佢自爆經常被修哥同四哥「點」，佢立即澄清：「講笑啫！話邊個去買嘢，四哥話猜，唔知點解我多數輸，我唔知佢哋有冇夾定喇，所以叫我做黑仔Joe；我其實好開心，同幾個大哥一齊去旅行，又聽到好多佢哋以前嘅嘢，又鍾意開玩笑。」問佢有冇搵四哥嚟睇騷？Joe Junior表示：「佢貴人善忘，上幾個月，佢請我去高爾夫球會鋸扒，跟住我同佢講『你令到《4個小生去旅行》人氣急升。』佢喺度笑，你哋明我講咩o架啦！」