【齊齊變唔_係啩】慶祝黃嘉樂40歲生日 詩詠子善扮馬國明天然呆

黃嘉樂、鄭嘉穎、馬國明、唐詩詠及林子善當年拍電視劇《鐵馬尋橋》，friend足咁多年，組成「鐵馬家族」，每逢生日嘅月份，或者大時大節，佢哋都喺網上貼出溫馨嘅合照，佢哋更愛屋及烏，不時攜眷出席飯敍，相處猶如一家人。

今日黃嘉樂喺Ig貼出大合照，留言：「謝謝親愛的，靜悄悄約晒呢班大忙人，送給我一個驚喜生日會，多謝大家，在心中!」不過相中唔見鄭嘉穎同陳凱琳，未知嘉穎係唔係出埠登台，所以抽唔到時間出席，而陳凱琳又陀緊BB，要多啲休息先冇現身。

今次呢個生日會原來係黃嘉樂女友Samantha為咗俾佢一個驚喜，同兄弟姊妹夾咗成大半個月先夾到時間，雖然遲咗半個月為男友慶祝，但女友仍花盡心思，事先book咗餐廳房，唐詩詠、黃心穎、馬國明、樂瞳、楊潮凱、傅嘉莉及陳少邦等，一早喺房等黃嘉樂，個個拎住手機影住門口位，等影黃嘉樂一入房嘅驚訝樣，Samantha又指林子善都有幫手安排呢個生日會，大讚林子善叻，林子善有喺Ig貼相，希望黃嘉樂日日開心，事業順利，快啲結婚，而唐詩詠就搞笑咁貼出合照，相中見黃嘉樂、林子善同唐詩詠一齊扮馬國明露出天然呆樣，唐詩詠更打tag稱「你生日你大晒」、「你叫我哋影咩就影咩啦」，估計係黃嘉樂叫佢哋扮。