【2年前患子宮癌】金燕玲證實患乳癌:唔難受但好驚
藝人金燕玲前年自爆患子宮癌,手術後需要接受多次化療,更因化療影響脫髮而決定剃光頭,但幸好有密友蘇施黃陪伴下積極面對,最後抗癌成功。日前佢跟隨蘇施黃步伐,開設個人影片頻道,首支影片就宣布再患癌症,消息猶如震撼彈,令人心碎。片中佢表現輕鬆,全程臉帶微笑,稱繼兩年前於農曆新年前發現患癌症後,今年新年前做運動時感覺到左胸有粒硬體,經醫生診斷後證實患上乳癌。
佢表示:「我即刻搵醫生檢查,直至年初五確診係乳癌,點解我要公開去講呢?人人都分享飲食扮靚,一來我希望呢件事由我自己口中講出嚟,二來係我之前患癌呼籲大家做身體檢查同埋買保險,但今次我唔係因為身體檢查揭發,係我自己摸到,對我嚟講可能係上帝保佑我,竟然畀我自己發現到。呢粒嘢(腫瘤)好細,我好幸運,因為已經開刀做完手術。」
目前已經完成手術嘅佢,表示自己屬癌症嘅一期B,雖然唔需要切除整個乳房,但仍要接受電療。期間佢忍唔住哽咽:「心情經過係好驚,我一講就好……我唔係難受,但個經歷真係好驚,原來胸對女人嚟講係幾緊要,醫生見完我話係樂觀,因為粒嘢(腫瘤)唔大,但佢話要開刀之後,一路做手術一路檢驗有冇擴散。」幸好,最終金燕玲已將腫瘤切除,兩粒淋巴亦冇受到癌細胞感染,手術後翌日就能出院。
佢坦言分享自己嘅故事為提醒大家:「我呼籲大家,當你得閒冇事就去摸吓,平時我都唔會摸,因為根本唔知腫瘤係點,但我今次經驗話畀大家知,原來我個胸突然好脹,粒嘢會覺得『哽』住好明顯,如果你摸到一粒奇怪嘢,就立即搵醫生。」續指:「可能好多人問有冇搞錯中兩次,係,我中過流感,兩年前後打孖上兩個癌症,但我不得不講我係好幸運嘅人,今次絕對係不幸中之大幸。」
其後蘇施黃於社交網上載一張兩人嘅合照,並留言大讚對方抗癌非常厲害:「金小姐叫我代感謝大家。佢真係好犀利的,做完手術第2日已出院,第3天已出街佢話唔好當自己有病匿埋喺屋企喎。我做司機蘇,駕車也小心翼翼,費事揼親佢。這幅相是手術後拍攝的,衷心多謝大家關心。」