雅虎香港新聞 【Yahoo Lunch K・Backstage】《哭牆》賣斷市 谷婭溦預告轉新形象
上集【Yahoo Lunch K】請到第一次上黎玩嘅谷婭溦Vivian同我咪霸張潔瑩一齊唱歌！
喺呢度要再一次恭喜Vivian嘅第一張大碟《哭牆》得到十分好嘅成績，仲一度賣斷市！出道六年終於擁有自己第一張個人大碟，Vivian形容第一次親手拎住《哭牆》嘅時候仲好似發緊夢咁，要不停拎住隻碟反轉再反轉先開始相信終於完成左自己一個好大嘅心願！亦都十分多謝Fans嘅支持，呢隻碟先可以有咁好嘅成績，仲話等咗六年覺得好值得啊！
講到今年喺音樂上嘅發展，Vivian就話其實大致上都已經計劃好哂，嚟緊就會用唱作歌手呢個身份繼續做音樂，努力作多啲好歌畀大家聽。
之前嘅作品《別再回頭》、《習慣》Vivian 都有參與創作，當然要問下會唔會有機會自己一手包辦曲詞啦，Vivian就話覺得音樂係要同朋友一齊enjoy一齊創作先夠開心過癮！所以嚟緊會繼續同不同嘅音樂人繼續創作。
Vivian仲透露大概六月尾嘅時候，將會有一個極大嘅突破出現喺大家面前！
等我直接引用Vivian嘅講法啦！
「拿！你而家識咗我谷婭溦係咁嘅，到時你見到果個我，你一定會，嘩！」
一直都覺得谷婭溦係唱抒情歌嘅，今次嘅驚喜將會打破大家一直以嚟對Vivian嘅印象咁話。聽聞仲好似計劃緊今年會有concert添呀，大家一定一定要留意住喇！
除咗音樂方面之外，今年Vivian仲會參與劇集嘅拍攝。原來Vivian一直都對演戲好有興趣，因為可以喺演戲過程中完完全全變成另一個人，可以做一啲平時冇機會做嘅嘢！
劇集經已開拍，但仲未拍到Vivian嘅部分，佢透露今次嘅劇本好有挑戰性，要飾演一個被男友家暴嘅女性，戲份都好重，令佢十分期待。
谷婭溦將2021年形容為好開心，好多挑戰嘅一年！
希望大家繼續留意呢一位咁努力，咁熱愛唱歌嘅女生！
睇更多YAHOO LUNCH K BACKSTAGE內容：
