雅虎香港新聞 【Yahoo Lunch K・Backstage】《聲夢》學員積極備戰 炎明熹靠瞓覺養聲
上集【Yahoo Lunch K】有咪霸潘緻慧(Waiwai) 同《聲夢傳奇》嘅五位學員傾下計唱下歌喇，五位學員分別係炎明熹(GiGi)、鍾柔美(Yumi) 、姚焯菲(Chantel)、何晉樂(Rock)同埋文凱婷(Aeren)。
GiGi 炎明熹
喺比賽中被觀眾視為冠軍大熱嘅 GiGi，之前因為喺比賽中演唱一首搖滾風格嘅歌曲時用聲過度而令一眾Fans都好擔心，大家唔洗咁驚，GiGi 表示聲帶已經慢慢康復緊，希望自己可以有多啲時間瞓覺等聲帶可以好好咁休息。講到瞓覺，GiGi 就話其實喺比賽中被視為攞獎嘅大熱都有相對壓力，問到點樣可以減壓，GiGi 就話一般嘅傳統方法，例如食嘢瞓覺都幫唔到手，而家自己就會每一次演出嘅時候，專心去做到最好去減壓。另外GiGi 提到自從參加咗比賽之後，對學業上嘅影響都幾大，所以比賽後會先出力追番學業先，希望可以同時兼顧到唱歌同學業。
Yumi 鍾柔美
有「嫩版鍾嘉欣」之稱嘅 Yumi鍾柔美，年紀輕輕14歲嘅佢已經參加過過百場嘅歌唱比賽，實力不容置疑，一首《狂野之城》upload youtube短短3日，就已達75萬點擊率，人氣急升。Yumi 就話其實真係諗都冇諗過會有咁好嘅反應，雖然網上一片好評，但 Yumi都挑剔自己，覺得自己可以喺舞台上再放啲盡情啲。
問到佢點睇「嫩版鍾嘉欣」呢個稱呼，Yumi 就話第一次聽到之後有照鏡望真啲自己個樣，都覺得有少少似嘅，同埋好開心Fans會覺得自己同一位咁成功咁靚嘅藝人生得似樣。
將唱歌跳舞視為由細到大嘅夢想，Yumi 就表示希望比賽後可以出盡力去嘗試向呢方面發展，盡力做好自己。
Chantel 姚焯菲
喺聲夢舞台上，形容佢係最能夠為觀眾帶嚟粉紅色泡泡氛圍嘅，Chantel 應該當之無愧喇，憑住一首《戀愛預告》仲獲得網民幫佢改左個「國民初戀」嘅外號，Chantel 話好開心Fans咁支持自己幫佢起咗呢個名，仲話其實從來都冇諗過自己可以行到咁遠，全靠Fans嘅支持佢先冇放棄，好多謝所有Fans咁錫自己。
唔好睇 Chantel 一直都斯斯文文唱好sweet嘅歌，原來佢最想試嘅係可以好似 Yumi 咁又唱又跳，希望可以突破下自己。
知道一眾Fans都好期待 Chantel 可以快啲出道，但係 Chantel 就講明一定以學業行先，讀好書，有時間嘅希望唱歌同學業都可以並存。
各位Fans要再耐心等下喇！
Rock 何晉樂
一邊追尋自己音樂夢之餘仲要一邊工作嘅 Rock，講過自己喺前段比賽嘅心理狀態唔係咁好，但係喺唱出《我不會唱歌》嘅一集就嚟咗個大反彈，以最高分嘅姿態完成。原來當中 Rock 都經歷咗好多嘢，開始參賽之後發覺自己低估咗比賽帶嚟嘅壓力，又要同時兼顧比賽同工作。同埋人大咗，要為自己嘅未來作打算，種種嘅顧慮都令到佢喺比賽初段表現得唔好，直到喺比賽中得到評判嘅鼓勵，Rock 先開始慢慢對自己有番自信，夠膽喺台上面盡情咁唱歌。
Aeren 文凱婷
Aeren 一直都畀網民話佢有好強硬嘅後台先可以行到嚟比賽嘅呢個階段，Aeren 就話要平反一下喇，佢由自己報名參賽嚟到今日，一直都好努力去做好自己，對於網民嘅負評，自己就有一套睇法會分析網民嘅評論，覺得清者自清，網民未必認識真正嘅自己，希望大家可以將焦點擺喺自己嘅努力上面。
仲有一年就完成學業嘅 Aeren 就話比賽後會朝住演藝方面發展，不過會先完成學業唔想半途而廢，鐘意 Aeren 嘅Fans好好期待一下喇！
炎明熹(GiGi)、鍾柔美(Yumi)
睇更多YAHOO LUNCH K BACKSTAGE內容：
