【Yahoo Lunch K・Backstage】區子琳點入行?林奕匡提師妹最緊要Enjoy

·4 分鐘文章

今次嘅【Yahoo Lunch K】除咗請到轉咗新形象嘅林奕匡上嚟分享佢嘅新歌 《沉思者》之外,Phil仲帶埋佢嘅小師妹、亦係今年嘅新人區子琳Paula上嚟一齊玩!

林奕匡相信唔需要我多介紹,但大家對區子琳呢個名字嘅認識可能就比較少。其實Paula本身係一位素人,平時會喺社交媒體上面發表一啲cover歌曲嘅影片。機緣巧合之下,呢啲影片被監製鄺梓喬Kimme聽到,佢更邀請Paula幫忙錄製demo。出於好奇心之下,Paula受邀開始錄製demo嘅工作,點知原來當次合作背後嘅真正原因係想借機會邀請Paula加入樂壇發展歌唱事業! 其後Kimme更將當時喺法國交流嘅Paula介紹畀Phil認識,喺佢嘅作品《從世界到我家》入面featuring,就係咁,就成就咗兩位第一次嘅合作!事隔幾年,今次 Paula終於帶嚟佢自己嘅第一首派台作品《怕什麼》畀大家聽啦!

區子琳(Paula)
區子琳(Paula)

問到Paula點睇自己由素人變成新人出道呢件事嘅時候,Paula直言自己當初都好驚訝,亦覺得呢樣係一件好特別嘅事。自己過往其實冇參加任何比賽或者有成為歌手嘅打算,純粹對唱歌有興趣,從來都冇諗過有一日會成為歌手!坦言做歌手「想像同現實」中有出入,但好彩幾年前因為其他合作,接觸到公司嘅同事,佢地事前提供咗好多做歌手嘅概念去提點自己,令佢今日能夠有一個準備好嘅心去面對挑戰。問到做歌手後最大困難係咩嘅時候,Paula覺得係自己個性太心急,經常想盡快完成所有事情,做到自己嘅目標;目前要學習調節自己心態去同團隊溝通,按部就班完成工作。

Paula第一首派台作品《怕什麼》
Paula第一首派台作品《怕什麼》

鏡頭一轉,Phil作為一位已經出道一段時間嘅師兄,見到初出茅廬嘅師妹,有無咩可以提點佢?回望初出道嘅自己又點睇自己嘅轉變?Phil就話時代已經唔同,十年前自己作為新人所學習到嘅事,如今要放喺Paula身上實行已經唔可行。今年自己都轉咗形象,出咗兩首新歌《時間的囚犯》同《沉思者》,都係行緊比較型格嘅新路線。笑言自己平時較陽光,但而家要習慣影相唔笑!雖然歌曲路線唔同咗,但無論有咩轉變,Phil認為最緊要都係要享受過程,繼續以音樂為出發點,做好自己!筆者又問Phil如果可以同剛出道嘅自己講句說話,佢又會講咩哩?佢話,好簡單,「你以為自己好努力,其實要多一倍!」,「努力一定會有回報,雖然未必會係成正比」,仲話無自信嘅時候就做更好嘅準備,裝備好自己,自然就會有自信;同時寄語Paula亦要畀啲信心自己,直言好欣賞Paula嘅歌聲,相信只要時機成熟,遇上一首適合嘅歌曲,就會得到更多人欣賞!

阿Phil今年轉新形象
阿Phil今年轉新形象

其實今年新人眾多,競爭真係非常大,唔知Paula又有冇咩目標呢?佢就話最希望自己可以堅持一步步嚟,摸索一下自己想做嘅音樂類型,裝備自己樂理上嘅知識,學習做想做嘅音樂!自己非常欣賞Serrini同林家謙嘅才華,佢地都係能夠身兼多職又非常出色嘅唱作人,希望日後有機會可以同佢地合作!Paula仲透露目前正籌備緊新歌,大概7月中左右可能就有得聽啦!

今次嘅訪問除咗令大家更認識佢地,筆者我從中亦都有唔少得著;再次提醒我做音樂嘅初心就係要「以音樂為先,做好自己!」相信做到呢點自然會有人睇到。我地都要一齊努力呀!

筆者Wai Wai、Phil、Paula合照
筆者Wai Wai、Phil、Paula合照

睇更多YAHOO LUNCH K BACKSTAGE內容:

【Yahoo Lunch K・Backstage】Wai Wai:寫歌咁正無人講?

【Yahoo Lunch K・Backstage】《哭牆》賣斷市 谷婭溦預告轉新形象