雅虎香港新聞 【Yahoo Lunch K・Backstage】吳林峰對獎項抱平常心 努力做音樂最緊要
上集《Yahoo Lunch K》請嚟我地嘅咪霸吳林峰做嘉賓，啱啱開完第一個個人演唱會，工作又愈嚟愈忙都抽空上嚟同我地唱歌傾計！佢仲帶咗新歌《明天一切如常》同大家分享。
吳林峰嘅歌出名好令人引起聽眾嘅共鳴，喺節目中 Fans 都有留言講到隻隻歌嘅歌詞都好入心入肺，吳林峰就分享同佢合作好密切嘅填詞人 T-Rex 好多時喺諗法上同佢都好相近，亦都好感謝 T-Rex 可以用咁靚嘅文字將想法寫入歌詞裡面。
講到寫歌，今年寫咗《樂壇已死》、Jer 嘅《狂人日記》仲有 Edan 嘅《小諧星》，好多人都會想知道究竟吳林峰點樣可以搵到靈感寫到咁多好歌呢？
佢就話其實音樂寫歌嘅靈感就係嚟自於生活，但係咁講又好似好老套，所以佢就用咗另一個方法形容，吳林峰好鐘意同朋友傾計，佢就發覺雖然每一個人嘅經歷唔一樣，但係當中嘅一啲 moment 講起又會好有共鳴，所以就將呢啲日常生活中所體會到嘅事寫入歌裡面。
吳林峰仲分享話靈感歸靈感，但係要將靈感整合變成一隻作品嘅時候，佢都需要靜靜地坐低一個人去沉澱先寫得出咁多歌。
啱啱開完第一個個人演唱會吳林峰就話而家仲經歷緊「Show後抑鬱」演唱會嘅所有畫面都歷歷在目，仲好想快啲有機會再玩多次！
吳林峰話由 Busking 到而家講咗開Show好多年，加入新公司之後好多謝公司咁快就幫自己開個人演唱會！演唱會入面嘅樂隊全部都係同吳林峰關係好緊密嘅戰友，當晚仲邀請到 Alfred 許廷鏗同 Jeremy 柳應廷做嘉賓。
由 Busking 開始音樂旅程嘅吳林峰，一開始要兼顧社工嘅工作同音樂的確幾吃力，覺得每日番工放工嘅生活好似搵唔到自己嘅存在價值。再加上自己由細到大對好多事都三分鐘熱度，唯獨音樂呢樣嘢一開始咗做就唔想停，所以把心一橫豁出去，開始咗用音樂作為職業嘅路。
年尾嘅頒獎禮就到喇，吳林峰今年都有提名但係佢就話一切隨緣啦！有得提名已經好感恩！仲話有啲嘢你愈想得到反而未必會得到，所以平常心面對，反正有冇獎拎都會繼續努力作歌唱歌！
期待吳林峰繼續寫多啲好歌，快啲開多次演唱會滿足各位Fans！
睇更多YAHOO LUNCH K BACKSTAGE內容：
