雅虎香港新聞 【Yahoo Lunch K・Backstage】吳若希談夫妻相處之道：有咩事都會坦白講
上星期的《 Yahoo Lunch K 之粉絲福利社》請嚟吳若希 Jinny 帶埋佢嘅新歌《火和火柴》上嚟，同我哋大派福利，除咗唱歌仲同網民玩埋你問我答，分享咗好多家庭嘅趣事，大家想聽返 Jinny講咗啲咩就記得重溫了!
講起新歌《火和火柴》嘅製作點滴，Jinny就透露自己喺構思新歌上參與度好高。事源係因為 Jinny 好欣賞 Eric Kwok 嘅作品《我不如》，所以今次特意搵來 Eric Kwok 操刀作曲同監製呢首新作品！除咗喺旋律創作方向上早有諗法，歌詞背後描述嘅愛情關係原來亦係嚟自佢一對好朋友嘅故事；呢對戀人因為家庭同群衆嘅壓力，需要收埋自己嘅另一半。佢哋嘅關係令 Jinny 覺得好心痛，好想問點解大家唔可以接受佢哋多啲，等佢哋可以公開關係咁相處。但同時 Jinny 亦睇到呢對朋友互相都好明白對方承受緊嘅壓力，願意做對方嘅隱形愛人，令佢好感動，所以就請咗填詞人林若寧將呢個故仔寫成《火和火柴》。林若寧亦都好理解 Jinny 嘅諗法，將 Jinny 嘅心聲放晒入歌詞度！
MV 方面，Jinny 就話自己嘅部分係喺香港拍嘅，而故事性嘅部分就搵咗一位台灣演員喺當地拍攝。MV特別用咗第一身視覺拍攝，希望帶出到 「隱形嘅另一半」嘅感覺，令觀眾可以較容易設身處地代入其中。其實呢位「另一半」係邊位並唔重要，重要嘅係喺兩個人嘅眼中，大家係點樣看待對方。最後，Jinny 都表示好滿意 MV 出到嚟嘅效果。
有留意開 Jinny 嘅朋友相信都知道佢係一位會同老公閒時耍下花槍嘅幸福人妻，看似「互相傷害」，實則打情罵俏。今次上到嚟，當然要請教下佢維繫幸福家庭生活嘅心得啦！問到 Jinny 會點樣評價佢同老公嘅呢段關係，佢就表示兩公婆當然會有互相忍讓嘅時候，但亦好慶幸大部分時間都係被遷就嘅一方。佢覺得佢哋兩個之間有一個好好嘅相處方式，就係有咩事都會拎出黎講，但講完之後好快就會冇事，通常都唔會留過夜，第二日就和好如初！假如收收埋埋唔敢講，除咗唔會對事情有幫助，當拖到事態更嚴重嘅時候，問題只會更難解決。佢亦奉勸大家同屋企人相處時，有啲咩事都要盡早溝通同處理。
身為兩個小朋友嘅媽咪，唔知 Jinny 又有冇喺同佢哋相處中學到啲咩呢？Jinny 就話小朋友就好似天使一樣，佢哋釋放嘅愛大到佢都唔識形容！當大人嬲嘅時候，往往要人氹、想理論；但佢就觀察到當佢嘅小朋友唔開心、受到委屈時，佢哋雖然都需要抒發情緒，但好快就會再次主動向大人表達愛。Jinny 接收到小朋友咁純粹嘅愛，令佢都多咗更主動向身邊人「示愛」。呢種咁有愛嘅互動，都好值得我哋從小朋友身上學習！
擁有多重身份嘅 Jinny 坦言，而家嘅自己會將家庭同小朋友放喺第一位。而喺演藝方面，佢希望可以喺唔影響家庭嘅前提下，繼續做自己喜歡、覺得舒服自在嘅工作。提到音樂，佢就表示會繼續邀請專業、有才華嘅人嚟幫自己手，做更多好歌送俾一眾樂迷！而喺咁多嘢要兼顧嘅狀態下，Jinny 話好感恩另一半非常值得信任，無論任何時候都會喺身後支持佢，令佢可以無後顧之憂咁埋首處理生活同工作上嘅大小事。就等我地一面聽住 Jinny 嘅新歌，一面繼續期待睇佢喺網上同大家分享佢地一家甜蜜又有趣嘅生活片段啦！
睇更多YAHOO LUNCH K BACKSTAGE內容：
