【Yahoo Lunch K・Backstage】布志綸攀石作歌 鞭策自己不忘初心
上星期【Yahoo Lunch K】請咗 Alan 布志綸同大家傾吓計唱吓歌!當然唔少得要介紹吓加盟新公司後嘅第一隻單曲《第一億次細胞分裂》啦!
大家可以飽享耳福聽到呢首咁有力量嘅歌,原來係經歷咗好多嘢先可以出到世。
Alan 喺訪問中提到,自己係一個好受身邊發生嘅事而影響心情嘅人,過去兩年所經歷嘅事令佢嘅創作都偏向灰暗,交咗十幾首歌都通通畀公司「彈歌」,公司希望佢加盟後推出嘅第一隻歌可以為大家帶嚟正面嘅力量。雖然「彈歌」呢件事經常發生喺唱作歌手身上,但 Alan 都話難免會有沮喪嘅感覺。
咁究竟 Alan 係點樣突破到,創作到《第一億次細胞分裂》呢?
事源有一日 Alan 約咗一班朋友去攀石,但因為前一晚先俾公司「彈歌」心情唔係咁好,果日起身原本諗住放班朋友飛機匿埋自閉吓,但係見到外面天氣咁好又咁齊人,最後都去咗攀石。
就係呢一個決定令 Alan 醒覺,其實事情再壞再艱難,太陽升起嘅時候又係新嘅一日。
亦都係因為咁 Alan 喺唱Demo嘅時候唱咗「It is another day.」入去。
最後就藉著呢日嘅感受,寫咗《第一億次細胞分裂》。
Alan 仲特別提到填詞嘅陳詠謙用細胞分裂去形容正能量,細胞分裂由1變2,2變4,4變8,再可以變成無限,除咗好似細胞咁不停分裂出唔同能量,再感染其他細胞之外,佢仲形容為就算有人想打低自己,自己都可以不停分裂更多可能性出嚟,只要唔認輸就可以靠自己得到逆轉性嘅勝利。
筆者請 Alan 喺歌詞入面揀最鐘意嘅一句去送畀 Fans,佢就揀咗
「這邊恥笑你,那邊想你死,你用行動作對比。」
喺【Yahoo Lunch K】直播嘅時候,有好多 Fans 都話做運動嘅時候聽住《第一億次細胞分裂》會特別有火,而呢隻歌嘅 MV 入面 Alan 就飾演一個曾經拎過金腰帶嘅過氣拳手,其實同現實中嘅自己都有啲相似。
不經不覺已經喺音樂圈裡面十三年,喺大大小小嘅場地表演過,經歷咗咁多之後,樂隊嘅其他成員都各有發展,而自己就繼續堅持做音樂。Alan 仲講到而家每一次做音樂都當自己係新人一樣,要不停提醒自己要記住初心,唔好忘記自己點解仲玩緊音樂。
繼續以個人身分唱歌俾大家聽嘅Alan布志綸應承咁多位Fans佢會繼續努力唱作,各位要好好咁期待同埋支持!
睇更多YAHOO LUNCH K BACKSTAGE內容: