【Yahoo Lunch K・Backstage】曾若華MV初演喊戲演技大爆發 望做多棲藝人

·3 分鐘文章

大家好,我係Waiwai潘緻慧!第二次光臨【Yahoo Lunch K】,由嘉賓搖身一變成為咪霸。今集請嚟JUDE 曾若華做嘉賓,分享她嘅新歌《醒》,傾傾佢嘅音樂動向。

相信有留意JUDE嘅觀眾對《零分》呢首歌絕不陌生,原來呢首歌同新歌《醒》都同屬JUDE「虐心情歌系列四部曲」作品,早前三首作品《切膚之愛》、《零分》、《十分錯》都係分享愛情裡當弱者嘅受傷經歷。迎來最終章, 今次佢終於要「醒」喇...!

新歌由徐浩監製,連同黄兆銘一齊編曲。作曲班底由JUDE、徐浩、齊樂平聯手合作。歌曲繼續由林若寧填詞,《切膚之愛》、《零分》、《十分錯》 同樣都出自佢筆下。

JUDE 曾若華 《醒》
JUDE 曾若華 《醒》

四首歌曲主題能夠如此緊扣,全因背後都圍繞JUDE嘅一段往事。原來創作首步曲《切膚之愛》嘅歌詞時, JUDE將自己喺同一段愛情關係中嘅親身經歷寫成四個段落嘅文字,Send咗E-mail畀林若寧;填詞人就住每個段落嘅主題將佢哋變成歌詞,最後就成為咗而加大家聽到嘅四部曲。得知道歌曲背後係一個又一個JUDE嘅親身經歷後,我由頭再聽一次呢四部曲,不禁覺得多咗一份心酸。

講到喺《醒》MV拍攝中初嘗崩潰爆喊演出, JUDE曾戲言從未聽過自己可以發出如此淒厲嚎哭嘅聲音;言談間又講到,自從佢早前上過彭秀慧老師嘅戲劇課程後,就好喜歡演戲。 奈何可以畀歌手發揮演技嘅平台可能只有MV拍攝。難忍戲癮嘅佢表示,希望日後可以喺演戲方面有更多機會,嘗試代入不同角色演出 ,做個「多棲藝人」。

JUDE喺MV挑戰嚎哭
JUDE喺MV挑戰嚎哭

提到新嘗試 ,我當然不忘問問JUDE喺音樂上嘅未來動向。JUDE表示《虐心情歌系列》嘅完結,正係另一個新開始。知道好多網民都話好喜歡《格拉斯哥流浪》呢首歌嘅風格,而自己亦好喜愛搖滾類型嘅音樂;所以虐心系列完結後,就會著手創作較貼近呢類型嘅作品。JUDE更透露自己將會於下一首作品中參與更多幕後音樂製作部分,包括錄製結他部分等等。

訪問過程中睇住JUDE談及自己作品時嘅雀躍,筆者同為唱作人十分明白能夠參與製作歌曲嘅樂趣。JUDE認為歌手應該要多作不同類型嘅嘗試,亦表示非常期待新章節嘅展開,如果日後有機會亦想嘗試做有電子音樂元素嘅作品。相信喺佢表示期待之餘,各位觀眾及一班粉絲亦急不及待,希望JUDE嘅新作品能盡快面世。而加就等我哋聽住《醒》嘅同時一齊期待JUDE更多滿分嘅作品吧!

樂手Justin、JUDE、WaiWai合照
樂手Justin、JUDE、WaiWai合照

睇更多YAHOO LUNCH K BACKSTAGE內容:

【Yahoo Lunch K・Backstage】小新:林二汶以身教展現真誠

【Yahoo Lunch K・Backstage】唱作人吳林峰分享首張個人專輯 帶來人生苦痛中一點甜