【Yahoo Lunch K・Backstage】曾被好姐妹搶男友 曾樂彤忍痛「拔刺」重新出發

上星期【Yahoo Lunch K】請咗最近推出新歌嘅曾樂彤上嚟同我咪霸張潔瑩一齊唱歌傾計,分享新歌。

新歌《拔刺》由曾樂彤親自操刀填詞,佢形容呢隻歌係一隻好直接嘅歌,喺訪問中提到拔刺好似形容喺一段關係入面會有一啲問題,就好似我地平時隻手拮咗條木刺一樣,會知道條刺嘅存在,唔掂到好似冇咩事,但係一掂到其實好唔舒服,所以好似好細嘅問題帶嚟嘅傷害可以好大,有時就要狠心「拔刺」,長痛不如短痛,要對自己好啲。

《拔刺》
《拔刺》

問到曾樂彤人生中最痛嘅戀愛經歷,佢就分享當時嘅男朋友同咗自己一位朋友一齊咗,到最後仲要喺朋友口中得知真相,事後花咗好長嘅時間先能夠重新出發。

除咗《拔刺》之外,仲要講吓曾樂彤第一隻為自己填詞嘅作品《躲不開的一課》。

《躲不開的一課》
《躲不開的一課》

呢隻歌搵嚟徐浩作曲, 編曲就由徐浩同黃兆銘負責。

一首關於成長嘅歌,曾樂彤就形容自己出道三年,2018年出道時因為當時都未有疫情嘅影響,仲可以有表演或者出席頒獎禮嘅機會。但2019受疫情影響直到而家,好感恩今年嘅情況開始好轉,但係過去嘅兩年就好似避唔開嘅一課咁,雖然係避唔開但亦都係十分珍貴嘅一課。

曾樂彤仲話自己最想躲開但係又偏偏躲唔過嘅一樣嘢,係「年齡」。

之後佢再補充,係想時間過得慢啲,等自己可以多啲時間完成自己嘅目標!

曾樂彤
曾樂彤

上次上嚟【Yahoo Lunch K】嘅時候,曾樂彤就分享過,如果可以嘅話希望有多啲機會以演員嘅身份出現喺大家嘅面前。機會嚟喇,飛雲!今年曾樂彤有份參與嘅電影將會喺暑假開拍,各位可以有機會喺大銀幕見到曾樂彤喇!

當然佢仲會繼續唱多啲好歌畀Fans聽啦!大家記得留意住喇!

曾樂彤、張潔瑩(筆者)
曾樂彤、張潔瑩(筆者)

睇更多YAHOO LUNCH K BACKSTAGE內容:

【Yahoo Lunch K・Backstage】葉巧琳玩上癮 1年出4首歌兼演音樂劇

【Yahoo Lunch K・Backstage】《聲夢》學員積極備戰 炎明熹靠瞓覺養聲