雅虎香港新聞 【Yahoo Lunch K・Backstage】符家浚入行8年 扮完林雪最想開個人音樂會
大家好，又係我咪霸Wai Wai！好開心今次請到符家浚（Calvert）嚟到【Yahoo Lunch K】 同我哋唱吓歌、傾吓近況！
八年前以暑期實習歌手形式作為新人出道嘅符家浚，呢幾年除咗係無伴奏合唱團成員，又參與過電影拍攝。做過各種嘗試後，今年決定用獨立歌手嘅身份，以出專輯同開個人音樂會為目標重新出發。八年時間話短唔短，唔知佢又點睇自己呢幾年嘅經歷呢？
憑住一首網上破千萬點擊率嘅歌曲《自動棄權》為大家所認識嘅符家浚，出道當年仲係大學生，一個暑假因為一首歌帶佢去過各大頒獎禮，品嘗過做新人嘅滋味。直言當時已覺圓咗歌手夢嘅佢，本來打算喺合約完結後就專注學業，估唔到喺大學期間遇上一班朋友，組成咗一隊合唱組合，為佢嘅音樂生涯揭開新一頁。
有留意開符家浚嘅朋友應該都知道佢係無伴奏合唱團 SENZA A Capella 嘅成員。呢一隊由大學時期成軍嘅組合經過多年努力，近年除咗發佈 EP 正式出道之外，上個月底更舉行音樂會，同樂迷分享佢哋嘅音樂。組合出道又試過，個人發展又試過，唔知符家浚鍾意以邊種形式做音樂多啲呢？佢自己就話其實兩樣都喜歡，兩種形式各自學到唔同嘅事，卻又相輔相成。過去幾年喺合唱團內學到嘅編曲技巧同音樂知識，對於而家作為獨立唱作歌手，喺創作方面都有好大幫助。
除咗音樂上嘅發展，符家浚喺最近上映嘅電影《殺出個黃昏》中擔任林雪嘅年輕版演員，初次拍電影嘅符家浚認為作為藝人應該向多方面發展，表示開心能夠參演之餘，亦期望日後有更多唔同嘅拍攝機會。
過去試過咁多不同類型嘅工作，咁符家浚日後又有咩大計，最想做嘅又係咩呢？佢就向我透露以下落嚟嘅幾個月將會推出多首不同風格嘅新歌，並希望喺年底前可以發佈新專輯！而最想做但未做嘅事就係開個人音樂會。行動力爆表嘅符家浚表示目前已經入紙申請表演場地，仲話希望可以喺不久嘅將來喺舞台上再以個人身份同大家見面添。
入行八年，要喺云云眾多歌手、每年咁多新人嘅樂壇中被大家記住並冇想像中咁容易。符家浚就話令人記得自己嘅方法就係用作品去提醒大家佢仲做緊音樂，亦希望嚟緊嘅作品可以突破到以前嘅自己；獎項係其次，更重要嘅係可以繼續忠於唱歌，做好嘅作品比大家聽到。我相信無論符家浚日後向邊個方向發展，喜歡佢嘅朋友一定會繼續支持佢嘅！一齊期待吓佢嘅新作品啦！
睇更多YAHOO LUNCH K BACKSTAGE內容：
