雅虎香港新聞 【Yahoo Lunch K・Backstage】聲夢學員分享淘汰感受 林君蓮冼靖峰望挑戰另類風格
今次【Yahoo Lunch K】再次請到《聲夢傳奇》嘅五位學員上嚟同咪霸Waiwai(潘緻慧) 唱歌傾計，今次分別有詹天文(Windy)、林智樂(Felix)、黃奕斌(Hugo)、「蓮姐」林君蓮(Kaitlyn) 同埋冼靖峰(Archie)。
第一位要講到嘅就係15歲嘅詹天文(Windy)
Windy係五位當中最早經歷淘汰嘅一位，問到被淘汰時嘅感受，Windy就話其實喺宣佈果刻心情一片空白，但其實心入面已經好似有預感自己會被淘汰，之後每一次諗起自己已經離開咗比賽就會喊，當中除咗唔捨得之外，仲覺得自己未做到最好，又因為種種嘅顧慮，未能夠將最真實一面嘅自己畀觀眾睇到。
年輕嘅Windy而家仲讀緊書，講到未來嘅計劃佢就話會先以學業為重讀好書先，但將來都係最想成為一個歌手，Windy仲想借今次訪問，好好多謝佢嘅Fans，因為Fans對佢嘅支持就好似喺黑暗中嘅光一樣，引領佢走過唔少個難過嘅晚上。
跟住就要講講林智樂 (Felix)
Felix喺比賽中受到評判張佳添大讚，亦被觀眾公認靚聲，被淘汰後引起一片熱烈討論。問到Felix淘汰後嘅心情，佢就話覺得如釋重負，因為喺比賽過程中壓力好大，除咗要排練比賽嘅歌曲，同面對住觀眾嘅各種評價，仲要擔心自己聲音嘅狀態，不過Felix話如果有得揀嘅話，一定會繼續留低比賽，但係就算而家已經被淘汰，都係抱住感恩嘅心。
仲有最遺憾嘅係冇機會喺比賽入面唱到偶像容祖兒嘅歌，希望之後可以拍一個Cover完成心願。講到未來嘅發展，原來Felix而家喺藝員訓練班做旁聽生，希望邊學邊做，成為一個藝人。
剛剛一集被淘汰嘅黃奕斌 (Hugo)
Hugo喺最近播出嘅《聲夢傳奇》被淘汰，筆者即刻補問Hugo嘅心情，佢就話感受係輕鬆嘅，當然被淘汰會有唔開心，但係已經非常感恩自己可以行到呢一步，仲話非常多謝咁多位導師，仲有幕後嘅每一位工作人員。
問到Hugo喺比賽中最大嘅遺憾係咩，佢就話仲未有機會可以表演結他自彈自唱，同埋未唱自己嘅作品俾大家聽。除咗唱歌之外，Hugo表示將來希望有機會嘗試多啲唔同嘅幕前工作，仲話好想嘗試下演舞台劇，感受一下劇場嘅張力。
跟住落嚟就要講吓兩位仲努力比賽緊嘅學員喇
「蓮姐」林君蓮
比賽嚟到呢一個階段，蓮姐喺訪問入面提到漸漸有一種迷失嘅感覺，開始分唔清到底係自己成長咗定係自己刻意去改變，雖然有呢種感覺，但係佢話每一次企上台嘅時候都一定會盡力做到最好，希望喺整個過程裡面，慢慢搵到自己嘅方向。
蓮姐仲講起，好多觀眾都覺得自己嘅歌路好窄，只係識唱某一類型嘅歌，所以最希望喺嚟緊嘅比賽有一集可以嘗試唱跳再加自己寫一段Rap嘅演出，畀大家知道原來蓮姐係可以駕馭唔同嘅風格！
最後一位要講講冼靖峰 (Archie)
Archie仲繼續喺比賽入面努力中，問到佢喺嚟緊嘅比賽入面希望自己仲可以有咩突破，佢就話因為喺比賽入面已經試咗好多唔同風格嘅演出，就會怕唔知自己仲可以做到啲咩去突破，所以嚟緊希望可以有一集專心咁企定定唱一首歌，用最純粹嘅情去感動觀眾。
有留意開Archie嘅觀眾就會知道，喺比賽入面佢經常挑戰唔同嘅曲風，佢就話嚟緊畀自己嘅功課就係希望可以帶一啲更加唔同嘅元素上舞台，可能係Metal或者美聲感覺強啲嘅風格，想畀觀眾睇到自己係可以Carry到唔同嘅歌曲，睇到佢另一面。
講到咁，大家要繼續留意比賽，睇睇最後嘅參賽者會出咩招喇！
筆者 張潔瑩
睇更多YAHOO LUNCH K BACKSTAGE內容：
