雅虎香港新聞 【Yahoo Lunch K・Backstage】胡鴻鈞試過做侍應 出道十年求突破
胡鴻鈞(Hubert)早前嚟到【Yahoo Lunch K】唱唱歌，同大家分享佢最新嘅音樂作品《今天不營業》同埋之後嘅計劃。
胡鴻鈞話做呢隻歌嘅出發點其實好簡單、好純粹，就係有一排好攰，咩都唔想做，好想Hea吓，頹廢吓⋯⋯而今年之前出嘅兩首歌都係比較正能量，有啲正面嘅訊息。所以想調返轉提吓大家唔需要時刻都好似超人咁，有時候都可以比自己休息吓。正所謂「休息是為了走更長的路」，都係另一種正能量，只不過唔係硬橋硬馬嘅方式呈現比聽眾。所以作品出嚟都係好chill，好relaxing為主。
講起返工，大學未畢業已經出道嘅 Hubert 喺直播中分享，原來佢都曾經做過一日侍應，而且個日仲係帶病返工真係好辛苦，最後好心嘅老闆帶咗 Hubert 去睇醫生，就係個一日嘅經歷令佢更加了解自己唔適合做服務性行業，唔喜歡有規律嘅工作，更加清楚自己要行嘅路。
嚟緊今年 Hubert 都會繼續出歌，大概年底就會推出。今年早前幾首新歌都同以往有好唔同嘅風格，例如R&B、比較 up beat 嘅節奏同埋比較 jazz 嘅曲風，所以嚟緊又會唱返自己比較擅長嘅 pop 風格或者係比較soft 嘅 Pop Rock。佢都表示年尾會有想出 EP 嘅打算，除咗而家收聽得到嘅 single 之外亦會有其他新歌喺裏面，希望大家多多支持。
Hubert 表示今次嘅 EP 主要由佢自己內心嘅想法，經歷同埋一啲想表達嘅感覺為主。所有歌曲都係與佢有關，源於佢。應該大家聽完之後會對「胡鴻鈞」有更深入嘅了解同認識。
今年係胡鴻鈞出道第十年，佢表示短期目標係舉行自己個人演唱會，希望好快可以實現呢個願望。而且亦都希望嚟緊可以不斷跳出 Comfort zone ，喺有生之年音樂上能有更加多嘅嘗試同埋突破。佢亦覺得多嘗試冇壞，即使失敗都起碼叫做試過，總好過將來後悔冇做過。
佢長遠亦都希望可以喺唔同嘅舞台，越來越大嘅舞台，甚至係世界各地表演，盡自己少少嘅綿力宣揚廣東歌。而估唔到嘅係 Hubert 最近熱愛嘅廣東歌，係哥哥張國榮嘅舊歌。佢話哥哥嘅音樂喺唔同嘅時間聽會有唔同嘅感覺唔同嘅味道。而最近被哥哥磁性嘅聲線同埋演唱時嘅感情深深打動。佢希望有朝一日自己嘅作品同演繹都可以帶畀歌迷同樣嘅感動。
加油吧，Hubert，我哋支持你！祝你新歌能夠有唔錯嘅成績，盡快有機會開個人演唱會啦！ ！ ！
睇更多YAHOO LUNCH K BACKSTAGE內容：
