雅虎香港新聞 【Yahoo Lunch K・Backstage】葉巧琳玩上癮 1年出4首歌兼演音樂劇
上星期【Yahoo Lunch K】有嘉賓葉巧琳(Mischa Ip)，加埋我咪霸小新一齊唱唱歌，同大家分享 Mischa 新嘅音樂作品、今年嘅計劃。
自從《造星》之後，我哋都冇乜機會見面，大家都忙。但如果比起葉巧琳的話，真係小巫見大巫。葉巧琳表示經歷過造星之後，發現自己嘅想法同以前好唔同，好想不斷尋求突破，不論係年初嘅《我們的音樂劇》，到新派台嘅作品風格同編曲，甚至係嚟緊嘅音樂劇，每項都係一個重大突破，一個全新嘅挑戰。
阿Mi 自《浸浴》之後就已經同公司開會，表明希望可以實驗更加多曲風，所以今次派台嘅新歌《怪物(心獸version)》嘗試咗 Nu-Disco，喺香港比較少見嘅曲風類型。佢話希望大家諗起葉巧琳嘅音樂就係創新、大膽、風格多變。
佢預計今年應該仲有兩首作品推出，都會繼續佢嘅音樂風格實驗。佢亦都坦言係比賽帶嚟嘅改變，因為喺比賽裏面需要經常做好多唔同嘅表演，其實有少少「玩上癮」嘅感覺，而且比賽亦令到佢真正體會到感受到表演同音樂無限嘅可能性，唔想再次用框框局限自己。再加上比賽幫助到 Mischa 經歷更加多心理關口，幫助佢建立自信，令到之後嘅表演比以前更加享受，更加感恩能夠企喺舞台上。
今次新歌嘅MV我都覺得好靚，藝術感好重。而且意想不到地搵來顧定軒 Zeno 做MV男主角，其中一個原因當然係佢哋係好朋友啦，而且 Mischa 希望主角能夠有一種森林裡面出現嘅王子感覺，加上 Zeno 有學過芭蕾舞，非常適合呢個MV，所以二人一拍即合。
至於MV最後短短出現嘅 Manson 究竟係咩意思？Mischa 就咁講：「當然係有啲鋪排啦⋯⋯至於接住落嚟嘅新歌會唔會有關連呢？就等大家拭目以待，相信會帶畀大家驚喜。」新歌嘅錄音部份已經完成，MV籌備緊，如無意外應該八月頭就會派台。Mischa 表示未試過人生裏面能夠一年出四隻歌，真係非常非常開心。至於歌曲會唔會有獎項或者有幾Hit，佢都冇所謂，只要能夠繼續唱歌，繼續出歌，就已經非常滿足。
嚟緊佢將會出演風車草劇團嘅年度音樂劇，總共21場，真係聽到都覺得唔惹少。 Mischa 話今次嘅音樂劇幾乎係零對白，差唔多全部都係以唱歌嘅形式演繹台詞，所以某程度上放心咗，因為專心唱歌嘅同時就已經演緊戲。而且某程度上亦都好似係一個試水溫嘅過程，睇吓將來會唔會向舞台劇發展？
雖然大家都好忙，但係短短嘅一個live環節同埋訪問已經令我好開心，除咗敘舊，能夠見證到比賽中識到嘅朋友不斷嘅成長蛻變，真係好感動。或者佢未來會向多方面發展，但係我相信佢最愛嘅依然都係音樂，最想做嘅都係音樂。唔知幾時可以見證到佢開自己嘅個人演唱會呢？我相信呢一日應該好快就會來臨。亦都喺呢度再次祝佢嘅新作品同埋嚟緊嘅音樂劇成功！
睇更多YAHOO LUNCH K BACKSTAGE內容：
