【Yahoo Lunch K・Backstage】連詩雅學識愛自己 出道11年想試Rap

今個星期嘅【Yahoo Lunch K】請到連詩雅 Shiga 上嚟唱佢嘅新歌《別放棄治療》之餘，佢仲同我分享咗唔少入行十年來嘅點滴，一齊回顧過去、展望將來！

Shiga 嘅新歌《別放棄治療》唱出一眾表面看似風光美好、但其實背負種種難處同掙扎而生活嘅都市人心聲，用作品勉勵自己同大家，無論遇見任何挫折都唔好氣餒，別輕易「放棄治療」！

其實上年 Shiga 已經出道十年，咁多年來嘅高低起跌相信亦唔少，諗返轉頭，唔知佢又點睇呢十年嘅自己，面對當中嘅低潮又會點處理呢？Shiga 就直言覺得以前嘅自己比較無知，好多事情嘅處理方法比較直接，睇事物亦比較單一同表面；而加嘅自己待人處事成熟咗，人生經驗豐富咗，明白好多嘢唔係只得一面，亦唔能夠只係睇表面。雖然呢十年經歷過大大小小唔開心嘅事同低潮，但樂觀嘅佢就認為正正係因為有呢啲經歷去鍛煉自己，先令到今日嘅佢睇嘢正面咗、堅強咗、EQ高咗，開始去接納自己嘅好與唔好。以前嘅 Shiga 唔係好識愛自己，好冇自信；經歷一切後越嚟越鍾意而家嘅自己。而加嘅連詩雅比以前敢於表達自己、爭取想要嘅事情；回想起亦慶幸曾經走過難挨嘅日子，先成就到今日嘅佢。

雖然 Shiga 從小就係一個樂觀嘅人，但再樂觀嘅人都會有唔開心嘅時候，唔知佢又用咩方法去面對呢？佢就話覺得自己係一個幸運嘅人，因為唔開心嘅時候，身邊總會有唔同嘅人出現，去帶佢渡過難關。以前好容易會因為一啲說話被打沉，但好在佢嘅性格令佢心情好快復原。Shiga 仲提醒大家，其實遇到唔開心嘅事，喺屋企喊一喊未嘗不可，唔需要害怕受傷害，因為呢個係人生必經嘅階段，逃避問題只會越嚟越難康復；面對唔開心只要勇敢面對佢，花時間諗點樣開心返，就會慢慢痊癒。

新歌《別放棄治療》同過往嘅歌曲主題比較唔同，Shiga 坦言以前嘅作品比較多情歌，出道十年後，音樂上除咗講愛情，仲有好多其他想法想同大家分享。特別最近幾年因為疫情，好多人都經歷緊好難過嘅日子，想透過歌曲勉勵大家，無論生活上遇到幾大嘅困難，都一定會有方法解決。只要你願意每日都繼續嘗試將難題逐少去拆解，一定有拆得開嘅一日。

訪問內我哋傾過好多過去十年嘅事，嚟到訪問尾聲，當然要問下 Shiga 有咩未試過但好想做，或者對下個十年嘅自己有咩期望。佢就話想再挑戰做跳舞歌，甚至想試吓唱Rap！想做跳舞歌嘅原因來自一個終極目標 —— 再次舉辦演唱會。仲係好愛唱歌嘅 Shiga 自覺要開演唱會唔容易，希望喺等待機會嘅同時可以儲一啲快歌，終有一日來自世界各地嘅粉絲都可以再次一齊見証佢開演唱會嘅大日子。Shiga 表示佢對未來充滿希望，亦十分相信吸引力法則，相信呢一日一定會出現。Shiga 嘅粉絲們，就等我地一齊集氣，係等聽 Shiga 跳唱快歌加 Rap 之餘，繼續期待連詩雅嘅新作品同演唱會啦！

睇更多YAHOO LUNCH K BACKSTAGE內容：

【Yahoo Lunch K・Backstage】陳葦璇「戀」上戇直陳天翱 BBQ邂逅結緣

【Yahoo Lunch K・Backstage】張潔瑩：點樣用丹田唱歌？究竟丹田喺邊度？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！