【Yahoo Lunch K・Backstage】 「M底」J.Arie 新歌繼續癲 預告演唱會似精神病院

·3 分鐘文章

今集嘅《Yahoo Lunch K x 粉絲福利社》本來請嚟 J.Arie 雷深如同大家唱歌傾計大派福利,不過當日J仔身體抱恙,未能夠親身出現派福利!不過唔緊要!我地都透過IG Live同J仔傾咗陣計!

至於派咗咩福利,各位粉絲就要睇番Yahoo 娛樂圈嘅IG @yahooentertainment.hk 喇!

《M的悲劇》
《M的悲劇》

承接住「精神病系列」繼第一部《雙面哈菲 HARVEY DENT》、第二部《陰陽道具》、第三部《判官之印》,終於嚟到第四部,新鮮出爐嘅新歌《M的悲劇》。

J.Arie話《M的悲劇》正正就係講緊自己嘅愛情觀,佢形容自己喺愛情上面係一個完完全全嘅「M底」,身邊嘅朋友都話當佢鐘意一個人嘅時候就好似鬼上身咁,會不顧一切咁衝埋去。

《M的悲劇》嘅MV當中帶有 Tim Burton 嘅味道都係因為咁而嚟,一個充滿色彩嘅愛情鬼世界。

J.Arie
J.Arie

J.Arie 成為咗獨立歌手之後,相比起以前音樂風格上有咗好大嘅改變,問到點解會有咁嘅轉變,佢就話喺2019年嘅時候,佢寫咗一本「誠實日記」,裡面有事業篇、愛情篇、娛樂圈篇等等。

當佢寫完之後睇番發覺原來自己係有「精神病」嘅,入行後經歷咗咁多事佢就決定擁抱自己嘅陰暗面,「精神病系列」就咁一步步誕生。

而喺寫歌嘅宗旨方面,J.Arie 就分享到其實想嘗試嘅曲風太多,所以佢寫歌嘅時候無論係寫俾其他歌手嘅曲定係自己嘅歌,都唔想局限咗自己,希望可以有多啲唔同嘅嘗試。

佢最想嘅係可以好似《判官之印》咁,將好多唔同嘅曲風放喺一隻歌裡面。

《Perfectly Guilty》演唱會
《Perfectly Guilty》演唱會

除咗新歌《M的悲劇》之外,大家一定唔可以錯過嘅當然仲有 J.Arie 嘅第一個個人演唱會《Perfectly Guilty》啦!12月10號就係喇!J.Arie 透露整個演唱會都會沿用「精神病系列」,希望用精神病去貫穿整個故事,聽歌之餘仲可以帶動多啲大家嘅情緒。

佢仲話大家可以當演唱會係一個精神病院,鐘意做咩就做咩,盡情咁享受一晚!

距離12月10號得番好少時間,J.Arie 就話仲未識得緊張,因為演唱會有好多事要處理,但係就差不多要閉關好好準備喇!

點都要問埋J.Arie演唱會之後仲有咩計劃預備咗,等大家可以期待一下啦!

佢話完咗演唱會後第一件事一定要休息番一個星期先,希望好好沉澱一下。

仲話應該會繼續「精神病系列」,大家好好期待一下喇!

筆者:張潔瑩

睇更多YAHOO LUNCH K BACKSTAGE內容:

【Yahoo Lunch K・Backstage】吳林峰對獎項抱平常心 努力做音樂最緊要

【Yahoo Lunch K・Backstage】吳若希談夫妻相處之道:有咩事都會坦白講

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能