雅虎香港新聞 【Yahoo Lunch K・Backstage】ToNick：有好歌就有樂迷 香港樂壇不會死！
上星期【Yahoo Lunch K】請嚟ToNick同咪霸吳林峰一齊迫爆studio！好少會有五個人同時出現，今次終於有機會喇！
ToNick第一次上【Yahoo Lunch K】當然唔少得唱歌俾觀眾聽啦！除咗一連串唱咗幾首ToNick嘅作品，仲即興唱咗由吳林峰作曲，小克填詞嘅《樂壇已死》。
筆者喺訪問中當然要問下ToNick點睇香港樂壇已死嘅呢種講法，ToNick主音恆仔分享咗自己嘅睇法，只要香港繼續有人做音樂，有人繼續聽廣東歌，樂壇係唔會死嘅，就算面對過去一年多疫情嘅影響底下，現場演出減少，但喺過去一年派台歌曲嘅數量係前所未有咁多！林林總總嘅網上音樂會、直播應運而生，所以只要有人繼續做音樂，聽眾就會用盡方法去聽歌！香港人總會搵到路行！
講到做音樂，ToNick嚟緊將會推出一隻黑膠唱片，當中除咗有新歌喺入面，仲重新錄製舊歌放埋入去，希望用而家嘅錄製技術將更加好嘅版本帶俾一眾Fans!
恆仔仲因為要錄製呢隻黑膠碟，自己都入埋坑，買咗部黑膠機係咁聽！
除咗呢個進行中嘅計劃，ToNick好快就會推出新歌，筆者有嘗試幫大家問下可唔可以分享下新歌嘅野，但係新歌就應該會喺呢篇訪問出街之後先推出，Keyboard手小龜就賣咗個關子，新歌會係一首好適合喺近期抒發感情嘅一隻廣東歌，大家記得好好留意一下喇！
另一樣筆者一定要問到嘅，就係ToNick幾時開演唱會啊？鼓手晨曦就話其實講開show講咗好耐喇，但係喺疫情底下真係好難畀到一個確實嘅日期大家，希望疫情快啲過去，大家可以一齊睇show啦！
喺呢度要再一次恭喜恆仔自導自演嘅電影《一秒拳王》成為票房冠軍！
恆仔表示嚟緊會繼續喺電影上作出其他嘅嘗試，希望嚟緊嘅計劃可以同班底作出更多嘅溝通，為觀眾帶嚟更精彩嘅港產片。
筆者私心希望繼喺《一秒拳王》裡面見到恆仔女友小花（譚杏藍）之後，下次有機會係恆仔嘅電影見到ToNick全部成員啦！
睇更多YAHOO LUNCH K BACKSTAGE內容：
