【AK、Jer、肥仔開燒鳥店】尖沙咀新開日式料理 粉絲必點同款料理

·6 分鐘文章

本地人氣男團成員AK、Jer@MIRROR同肥仔@ERROR首次開餐廳做老闆,各位粉絲係咪想知有咩食?三位老闆各自設計咗啲咩菜式?仲有咩特色菜值得大家留意?開飯仔就搵嚟餐廳負責人幫大家逐一解答!

各位粉絲認住呢張吧枱,從左三開始到右邊分別係AK、肥仔、Jer坐過嘅,去到可以坐返同一位置打卡!

影の鳥坐落尖沙咀亞士厘道,店名係肥仔嘅構思,背後意義係「好似影子咁陪住粉絲享用美食」!問到三子點解會選擇開日式燒鳥店?主理人之一Jacky Ip就指原來係佢哋食飯嘅時候傾開,想搵個地方可以同朋友聚會,而串燒就係幾位老闆都鍾意嘅嘢食,亦都係粉絲同大眾容易接受嘅種類,價錢相宜。餐廳而家已經Full Booking到出年2月,睇嚟三位老闆的確號召力驚人!

AK/Jer/肥仔同款料理大解構!

九龍球(每日限定10客,$98/6粒,$188/12粒)
九龍球(每日限定10客,$98/6粒,$188/12粒)

三位老闆都鍾意食又識食,今次開店都分別提議或者推介咗唔少菜式。同哥哥一齊開舖嘅AK建議將日本近年流行嘅九龍球作為甜品,晶瑩剔透嘅啫喱球其實係用寒天粉製作,裡面就係時令水果,淋上黑糖蜜再以金箔裝飾,打卡一流!因為係人手製作所以數量有限,建議生粉們訂座時預訂埋呀。

黃金鱈場蟹卷($188/4件)
黃金鱈場蟹卷($188/4件)

而Jer就特別挑選呢款黃金鱈場蟹卷加入餐牌當中,上面係炙燒鱈場蟹肉,卷物當中就係松葉蟹肉,記得點埋附上嘅蟹膏味噌一齊食,食齊三重鮮味同口感!卷物中間仲有水菜,清新爽脆平衡膩感。

月見燒雞肉棒($58/串)
月見燒雞肉棒($58/串)

而肥仔就指明要有得食日本燒鳥店常見嘅月見燒雞肉棒,以手打免治雞肉再掃上日式照燒汁,燒至外層微脆裡面軟嫩,雞肉更混入軟骨,口感豐富。識食當然要點埋日本生蛋黃一齊食,口感更柔滑多汁,鮮味亦更上一層樓!肥仔仲親自設計糅合火同扇嘅圖案嚟代表燒鳥嘅家紋,同店內員工著嘅制服。

日本訂製烤爐+華味鳥稀有部位串燒

特別請嚟沖繩出身嘅日籍大廚仲泊大阿(Nakadomori Takuma)師傅設計多款串燒同料理,大廚有10年料理經驗,曾任職於日本多間餐廳。亦於日本訂製炭爐,高溫可以鎖住食材水分。燒鳥選用日本博多華味鳥及九州雞,仲有多個稀有部位選擇。

(左至右)鹽燒和牛粒($128/串)、燒雞心($42/串)、燒雞頸($46/串)、燒雞尾($42/串)、鹽燒雞肉串(明太子醬)($48/串)
(左至右)鹽燒和牛粒($128/串)、燒雞心($42/串)、燒雞頸($46/串)、燒雞尾($42/串)、鹽燒雞肉串(明太子醬)($48/串)

鍾意食串燒送酒嘅朋友特別推介試燒雞尾,燒過更突顯其肥美甘香,而且難得無肉腥味。燒雞心亦係推介,每隻雞只有一個雞心,而呢度一串已經有四件,口感鮮嫩帶嚼勁。最罕有嘅係雞提燈($48/串),即係老母雞嘅輸卵管連同未有殼嘅蛋黃、供應極少,加上餐廳希望令大家食得安心啲,堅持選用日本貨,有機會遇到嘅話一定要試啊!

串燒亦包括豚肉、牛肉、海鮮及野菜類,例如鹽燒和牛粒就係三位老闆12月試菜時食過嘅同款串燒,另一推介係燒日本室津牡蠣($68/隻),蠔肉飽滿Creamy。

日本地方+特色料理推介

北海道風雞皮烏冬($98/客)
北海道風雞皮烏冬($98/客)

另一送酒必食料理,意念嚟自Jacky嘅北海道好友,會先將雞皮煎香,用煎出嚟嘅雞油同高湯一齊煮烏冬,再以大量京蔥舖面。雞皮口感彈牙,滿嘴油脂甘香而唔油膩,加上有京蔥嘅微辛平衡味道,暖胃又無負擔感。

鴨肉水菜鍋($308/客)
鴨肉水菜鍋($308/客)

冬日最啱食鍋物,雞肉或者牛肉嘅大家可能都食過,鴨肉鍋物就相對少見。以昆布清湯配搭法國鴨胸同日本直送水菜,建議食法係將鴨胸灼兩至三分鐘,啱啱熟夠嫩滑。食過鴨肉再加入水菜煮熟,水菜會吸收湯底鮮味同鴨油精華,鮮味同香氣都會加倍。

煙燻雞肉刺身($128/客)
煙燻雞肉刺身($128/客)

選用肉質粉嫩嘅博多華味鳥,喺日本養殖嘅時候經過嚴格品質監控因而可以生食。師傅會以蘋果木及櫻花木煙燻雞胸肉至半熟,白煙飄出感覺特別夢幻,刺身肉質柔嫩,帶淡淡煙燻木香。

(後)蟹味噌配鮮野菜條($88/客),(前)日本博多華味鳥雞肉丸($36/串)、日本蘿蔔($32/件)、牛筋($28/串)
(後)蟹味噌配鮮野菜條($88/客),(前)日本博多華味鳥雞肉丸($36/串)、日本蘿蔔($32/件)、牛筋($28/串)

蟹味噌係用生拆蟹肉、蟹膏加日本味噌煮成,濃稠鮮甜。用冰凍野菜條、例如今次拍攝嘅新鮮青瓜同甘筍點嚟食,清脆又惹味,係開胃小食之選。冬天另一暖胃推介係日式關東煮,湯頭清甜,而且食材都煮至軟腍入味。可以按喜好點少少日式燒汁或者芥末醬提鮮。

餐廳自家純米大吟釀清酒

「影の鳥」自家純米大吟釀清酒
「影の鳥」自家純米大吟釀清酒

食日本菜點可以唔配返杯清酒呢?餐廳仲有自家純米大吟釀清酒,味道偏甜易入口,餐廳建議係配返啲味道比較濃嘅食物,好似主打嘅燒鳥就啱啱好!

三位老闆就係坐喺VIP房簽自家清酒,餐廳裝修亦走三子喜愛嘅暗黑型格風
三位老闆就係坐喺VIP房簽自家清酒,餐廳裝修亦走三子喜愛嘅暗黑型格風
餐廳主理人之一係日本料理達人Jacky Ip,入行16年經驗豐富
餐廳主理人之一係日本料理達人Jacky Ip,入行16年經驗豐富

影の鳥
地址:尖沙咀亞士厘道9至11號順豐大廈地下
*晚市只接受網上訂座,晚市不招待未成年人;營業初期只於星期六、日及公眾假期開放午市,暫不設平日午市套餐至另行通知;晚市及午市各設最低消費,暫不接受一人訂座

文:Cathy.H
相、片:Michael Cheung

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能