【Boss Talk】港殿堂級銀行家！袁鯤濤：提防金融危機大爆炸

緬懷，總是美好而溫暖的，袁鯤濤（Anthony）談起昔日銀行家歲月亦唔例外。

當大家都討論金融科技是否顛覆銀行業，機械人會否淘汰真人類時，上世紀70年代香港經濟起飛，外滙交易生意「湧住嚟」的黃金歲月，就更加令人追憶。那些年，市場高手如雲粒粒皆星，若果做banker，時機有得揀，答案幾乎就這樣：

「梗係會懷緬過去，我答你就好簡單，梗係做返以前㗎嘞，以前發展無咁多局限，雖然現在條例監管都係好既，但局限性亦大咗好多…」

袁鯤濤，本地第一代知名華人交易室銀行家，74年加入美國銀行，77年開始投身金融市場，專責外滙買賣的客戶服務及營銷，亦涉足過債券交易及資金拆放，由盤房管理做到亞太區一哥，與銀行業結緣44年。

跟他同代的交易室大佬，個個名字響噹噹，包括當年花旗三劍俠，黃鋼城（Frank）、梁錦松（阿松）及黃逸思（YS），每位都盤房出身晉升到大老細。

外滙市場曾如此煙花盛放，是英雄造時勢抑或時勢造英雄？袁鯤濤不假思索說：「我諗時勢造英雄因素大好多…我唔排除有啲人係特別叻，但都係因為時勢當時係好就我哋。」

70年代本港剛實施浮動滙率，企業與個人套戥及投資需要急升，銀行代客買賣或自營坐盤，收益皆水漲船高。

他口中「特別叻」的人，正是黃鋼城、梁錦松及黃逸思；但袁笑說高手不包括自己。

08年退休的Frank黃，卸任前是星展集團副主席；YS退休前長駐美國發展，曾是花旗集團最高層華人banker；如今仍活躍市場的，只有南豐集團董事長兼行政總裁梁錦松。

「如果你講呢幾位，係識咗好多年既朋友，大家都有唔同發展…以入行嚟講（金融市場買賣），第一個係Frank，第二個係阿松，YS應該早我少少…阿松嗰時（82年袁從加國回港）已經上咗神枱做老細。」

黃鋼城是他們一代老行尊，做過梁錦松老細，現在袁鯤濤最常聯絡的亦是這位老友，二人分隔港星兩地但仍定時見面，「佢娶身抱我都有飛過去（獅城）飲」。

回望40多年職場生涯，Anthony覺得既感恩又好彩，身處市場大時代，除了賺取不俗回報亦算做到一番成績，相識數十載的行家朋友，交織成一個綿密細膩的人情網，盛載珍貴回憶，「所以我覺得我欠咗銀行業係好多」。

但如果市場是一個舞台，那麼再好看的戲碼，都有悄然而退的一刻，落幕後下一場戲又上演甚麼？

金融科技勢不可擋，盤房交易程式化，人脈關係變得遙遠，銀行業黃金發展已一去不返？

「睇你講乜嘢叫黃金階段，如果係賺好多錢，職業發展機會既，的確困難咗。」

但關鍵還是審時度勢。他認為純落盤執行等工種可由機械人、AI取替，個人不宜硬撼；倘屬創新產品又非迷債等毒藥，年輕人頭腦靈活亦屬個人志趣，仍可投身發揮，「最緊要知道銀行未來個勢」，同時要提防一不小心，金融危機大爆炸－Minsky Moment（市場崩塌）驟然而至，「以後既機會係要自己搵」。

在市場中成長的袁鯤濤，仍習慣每天追踪新聞動態，私人辦公室內不同位置，都放iPad及桌面電腦，方便他行到邊睇到邊緊貼消息。退休近10年，這位banker不離地，「一定要跟住時代脈搏走」。

採訪：劉美儀、陳家恩
撰文：劉美儀
影片編撰：陳家恩、余曉芸
攝影：馮峰、釗@Real finder
剪接：何文超
編導：劉曉彤
編審：倪敏慧