【Delay大半個鐘】林志穎臨閂機門要求攞寄艙行李 同機乘客抱怨：要全機人等佢，好過份！

近年經常有乘客大鬧機場或機艙，行為令人側目又討厭，估唔到今次輪到台灣男星林志穎。經常穿梭中港台嘅林志穎，日前由香港坐飛機返台北，喺空姐臨閂機艙門之際，佢一句話要攞番件寄艙行李，阻礙空姐工作不特止，仲要全機乘客等佢，令航班延誤咗成個鐘，唔少同機乘客都怨聲載道。

當晚同機嘅讀者陳小姐向《蘋果》報料指，當時乘坐晚上10點55分，由香港往台北嘅航班上，林志穎乘坐商務客位，同佢同行仲有3人，陳小姐話︰「當時所有乘客已經上晒機坐定定，空姐準備要閂機艙門，林生突然提出話要攞番件寄咗艙嘅行李，雖然佢態度OK，但佢咁樣搞一搞，成班機都delay咗，好自私。」陳小姐表示當時機上幾位空中服務員，處理得好好，陳小姐話︰「空姐要求林志穎佢哋要有一位乘客落機去認領番件行李，咁都好合理吖，唔係邊個去攞？冇理由叫空姐去攞。」

陳小姐仲話︰「落機嘅乘客係林志穎同行嘅其中一人，而佢自己就冇落機，人同行李落咗之後，空姐就即刻閂門，班機先開到，前前後後搞咗成大半個鐘。」陳小姐覺得林志穎作為藝人、公眾人物，行為舉止更加要自我檢討，「佢係藝人，唔係大晒，坐商務位啫，就算係坐頭等位都唔代表你有特權，其他乘客嘅時間，唔係時間咩？要全機人等佢，好過份囉！」

睇番林志穎嘅微博，11月28日凌晨佢貼咗張身在新加坡機場嘅相，留言寫住︰「準備夜飛。」仲標示自己身在新加坡樟宜國際機場。到第二晚，即係11月29日晚接近11點，佢就從香港坐飛機返台北，但佢嗰晚7點幾，喺微博貼咗張相，寫住︰「昨晚的夜上海。」估計佢28日從新加坡飛咗去上海，29日從上海飛嚟香港，當晚佢喺香港亞博出席一個群星演唱會，同場仲有湯寶如、魏駿傑。而林志穎當晚做完活動後，即晚乘機返台北，但係佢隔咗一日，先至將演唱會嘅相貼上其社交平台，而佢兩日內穿梭中港台新四地，認真忙。

而日前台灣有報道指，堪稱台灣演藝界第一跑車王嘅林志穎，盛傳佢以1億新台幣（約2,580萬港元），向台灣車界名人陳憲章，買咗對方架全台唯一、全球限量500輛嘅頂級超跑，因為呢部車已經停產，有錢都唔容易買到。有指林志穎，因近排大陸敏感嘅稅務問題，所以佢低調交易。