【hmv清盤】投資發行電影及院線 蕭定一靠《3D肉蒲團》賺第一桶金

(資料圖片)
(資料圖片)

今日蕭定一旗下hmv零售公佈自願清盤,加上近年其公司牽涉多宗欠款訴訟,有指他曾四度加按豪宅。

由蕭定一擔任主席嘅hmv數碼中國集團,其主要業務,以投資製作及發行電影、藝人管理、及影院經營等。講到電影製作方面,2011年推出三級電影《3D肉蒲團之極樂寶鑑》,自稱係全球首部IMAX 3D情色電影,因錄得$4,100萬票房大收旺場,成為2011年全年最賣座嘅港片,亦係首部三級片成為年度票房冠軍。一方面為蕭定一賺到第一桶金,亦令佢投資製作電影打下強心針。

再投資拍攝嘅情色電影《一路向西》,雖然票房不及《3D肉蒲團之極樂寶鑑》咁好,亦引起唔少話題。往後其公司投資電影,都以小品愛情故事或劇情片為主,如《十月初五的月光》、《導火新聞線》等。

相關新聞:HMV遭財仔入稟追數

不過2014年大製作《冰封俠重生之門3D》,卻未如理想,中港加埋只收得約2億票房。往後的港片製作如去年《小男人週記3之吾家有喜》及叫好叫座嘅《29+1》,只錄得$1,500萬左右嘅票房。至於今年賀歲片《棟篤神工》,憑黃子華嘅氣勢下錄得$4,470萬票房,暫時係2018年最高票房港產片,不過另一部《洩密者們》只得$324萬票房。

除投資及製作電影外,蕭定一旗下公司都有發行外語片,如今年有《冰封俠時空行者》、《閨蜜2之單挑越南黑幫》、《天凶之城︰末日救贖》等。而明年會發行嘅西片《白宮淪陷》系列第三集《ANGEL HAS FALLEN》。另外,其業務仲有喺大陸經營戲院,如廈門、廣州、重慶、福建等。

此外,今年4月樂視出現財困,hmvod曾出手向選用樂視體育香港嘅客戶,提供6個月免費試睇電影組合嘅優惠,涉及金額達$264萬。