【MIRROR入紙開紅館】跨年檔黃金期變邪位 連續3年搞唔成

有傳MIRROR經理人花姐入紙申請年底至明年初紅館檔期，幫12個仔開首次紅館演唱會。如果真係做跨年show，MIRROR可能係Twins之後，第2隊出道時間最短就登上紅館跨年檔嘅組合，真係成就解鎖。

MIRROR能夠冷手執個熱煎堆，除咗因為搞手們都擔心疫情一旦再爆發就要取消演出，分分鐘蝕過百萬；另一個原因就係，近3年嘅紅館跨年檔期，都因為唔同原因要取消。如果MIRROR入紙成功，show前記得小心！

2020 － 楊千嬅

舊年疫情一度好轉，部份演唱會立即去馬，張敬軒x香港中樂團就係喺11月舉行。得到呢個期嘅千嬅亦都決定開show，公開售票都做埋，但係突然年尾個案數字上升，政府再宣佈限制措施，主辦單位決定取消，據聞損失200萬。本身紅館都將跨年期留俾千嬅，但係有傳千嬅一方應該決定唔開。

2019 － 陳奕迅

自2013年開完紅館show之後，陳奕迅原定事隔6年後再開演唱會，仲係以新巡迴演出主題Fears and Dreams做賣點。唔使問，啲飛好賣到一個點，要開25場，打破Eason歷年紀錄。後來演唱會因為反修例運動而取消。其實2019年最火紅火熱嘅半年期間，陳綺貞、張敬軒都cancel咗原定紅館演唱會，王力宏個期就由費玉清頂上；而Sammi、祖兒、謝安琪、關智斌、蕭敬騰嘅紅館show反而開得成。

2017、2018年 － 劉德華

華仔嘅跨年show真係一波三折。2017年初華仔因為墮馬受傷要休養，本來book咗嘅紅館跨年檔，要拱手相讓俾楊千嬅頂上；到2018年開得成，點知遇著華仔患上流感，最後7場跨年場次無法舉行。主辦方決定喺去年2月為呢7場觀眾補場，另外再加多5場公開售票，最終因為疫情而取消。計下數，對上一次劉德華紅館show，已經係2010年！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！