【P圖高手】Cammi教擺甫執相技巧 跟足7招變靚啲

藝人都愛po相呃like,以前話「工欲善其事,必先利其器」,依家影靚相,未必要一部靚相機,最緊要係識P圖。

講到P圖,不得不說o靚模謝芷蕙(Cammi)係高手,佢會令相中嘅自己變「九頭身」同「蛇精」。Cammi日前接受《蘋果》專訪時話:「一張靚相最緊要角度,後期我會用apps去執相,平均一張相用兩個apps,我好着重相嘅細節,首先會微微推瘦身形,跟住會執大對眼,調番色,因為有時街上影相冇藍天白雲,我會將天空推藍啲。我注重成張相結構,唔止個樣,我成日睇Ig啲外國blogger,想學佢哋咁。」

《蘋果》就搵咗Cammi分享貼士,由擺甫、執相,到將P好靚相放上Instagram,Cammi逐個步驟講解。

【自拍大特寫】
Cammi話:「我通當鍾意擋住少少面,呢招無論個人瘦同肥都好啱用,我塊面有凹位,咁就可以遮住,睇上去會圓啲,肥臉人又可以遮住肥嘅位置,咁睇上去塊臉咪瘦啲。」

【高炒低炒】
Cammi話:「高炒睇上去可愛啲,低炒適合面瘦冇雙下巴嘅人,睇上去瘦啲。」

【擺甫士】
Cammi話:「我唔知點解會擺遮臉、撥頭髮、闔埋眼同V手勢,順其自然慣咗,特別係遮住塊面,好work,紮咗頭髮咪整吓,擺V字日本妹啲。闔埋眼可能懶得P相,咁可以P少一個step。」

【角度】
Cammi話:「我面瘦鍾意影正面,如果面肥有肉地,建議佢高炒,咁影落去會V啲,塊臉出嚟瘦啲。」

【半身相】
Cammi話:「有時冇人幫手影相,或者喺餐廳,又唔想煩到男朋友,我鍾意將手機放喺枱前,再校3秒自拍,咁我空出嘅手可以拎住食物、道具自拍,影5、6張不停撳。」

【全身相】
Cammi話:「影全身時,想對腳長啲,可以一前一後企,出嚟效果會長少少。如果俯前,身形比例就唔好睇,我反而身會傾後,腳向前放少少,咁顯得腳瘦啲。團體相一定唔可以高炒,會顯得頭大身細,腳會好短,人就好奇怪,唔好睇,影全身時,揸機嘅最好喺心口位嗰高度,水平影出去,要將人像構圖放喺框位內,盡量要貼啲。」

【P圖】
Cammi話:「放大張相睇,如面太瘦就推圓少少,有時影手角度特別幼,就會推番勻稱,用『無他相機』apps都其實唔使點執,有時燈光唔夠,同個人膚色唔靚,我會推番白啲。我有時也用『美顏』相機,跟住用『Vsco』apps調色,相執靚就任務完成,可以po上Ig。」

直擊Cammi執相,佢真係好專心,佢話:「執一張相,我約花15分鐘,其實係咁po相,執一張要15分鐘算好耐㗎喇。」問到Cammi對靚女嘅審美觀?佢話:「自然、清新,依家唔興太濃妝,太俗同造作,我鍾意簡單風格。」佢話睇靚女,樣靚同身形都兼備:「都要計分,可能樣靚,身形唔夠都唔perfect,我偏向鍾意歐美網紅,鍾意自然不造作嘅女仔。我細個時化過妝濃,打扮誇張,黐好大塊眼睫毛,可能覺靚,但依家大個咗,覺得越簡單越靚,人成熟咗,化妝經驗多咗。」Cammi話佢欣賞嘅KOL有倪晨曦:「佢樣自然,好靚,好sweet,我有follow佢Ig,佢有分享打扮同護膚,10分滿分,我畀佢9.9分。」

Cammi偏向喜歡白高瘦,佢話:「我鍾意高瘦類型,又唔好太瘦,摸上去少少肉地,正正常常,我自問唔算瘦,我睇上去同摸上去都有少少肉地。我體重有52kg,一直都重,仲唔容易瘦,最容易肥喺肚腩、大髀同上圍,如果瘦落嚟,都係瘦上圍先。」Cammi係甜品控,又為食,「日日都要食甜品,一唔開心就想食甜品,食甜品心情好啲,人哋話女仔有兩個胃,我食晚飯食到好飽都想食個雪糕,可以唔食飯,一日要食兩塊朱古力。」不過Cammi發現肥咗都會跑步做運動。

問Cammi覺得自己全身邊個部位最靚?佢答:「我最鍾意自己鎖骨,可以『養金魚』,係天生,夏天會鍾意着一字領衫,其他部位合格啦,五官都合格有60分,好滿意,但腳可以瘦少少,最好可以減到50kg,或者將全身嘅肉變肌肉,我要勤力做吓運動。」其實睇Cammi嘅社交網,有一期佢過度P圖,網友揶揄佢變「蛇精」,Cammi話:「以前我可能覺得(蛇精樣)靚,執相會夾硬將眼變大,臉變到好瘦,以前審美觀唔同,依家執相,反而會將塊面執肥啲,真係太瘦太凹,有時遠影,朋友輪流執自己樣,我見自己個樣,某角度覺太瘦太凹,就會執番闊少少,唔難照推。」Cammi咁貪靚,同男友易先生合照,男友可要求執埋佢嗰份?Cammi竟爆料:「佢會幫我執相,佢仲識執,可能之前同人執過,我冇問佢。」

Cammi分享點樣自拍同P圖最靚。(攝影:陳俊強)
Cammi分享點樣自拍同P圖最靚。(攝影:陳俊強)
Cammi話闔埋眼影相,P圖唔使執對眼。
Cammi話闔埋眼影相,P圖唔使執對眼。
Cammi示範點樣擺靚甫士。
Cammi示範點樣擺靚甫士。
Cammi絕對係自拍‘高手。
Cammi絕對係自拍‘高手。
Cammi喜歡較啱靚角度自拍。
Cammi喜歡較啱靚角度自拍。
Cammi表情多多。
Cammi表情多多。
有時喺餐廳,Cammi會放手機喺枱較時間自拍。
有時喺餐廳,Cammi會放手機喺枱較時間自拍。
自拍完就要揀相去P圖。
自拍完就要揀相去P圖。
Cammi都慣手勢擺V字。
Cammi都慣手勢擺V字。
Cammi成功放相去Ig,相兼P圖前後才幾分鐘。
Cammi成功放相去Ig,相兼P圖前後才幾分鐘。
Cammi嘅Ig相P 度好誇。
Cammi嘅Ig相P 度好誇。
Cammi自覺鎖骨最靚。
Cammi自覺鎖骨最靚。

採訪:比華利
攝影:陳俊強
攝錄:廖達燊
場地:KIR ROYAL