【STOP ANGRY】被老婆仔仔徹底馴服 樂壇黑面神陳小春：我變咗成嚿番薯

曾經被封為「樂壇黑面神」的陳小春，前年帶兒子Jasper到大陸拍真人騷《爸爸去哪兒5》，因黑面喝駡兒子行得慢，Jasper用擴音喇叭對爸爸說：「Can you stop angry now?」這幕畫面令人印象難忘，作為父親的小春自我檢討，於去年尾展開巡唱的他，更以「STOP ANGRY」做演唱會主題。

將於4月6日唱到澳門的小春，日前在尖沙嘴接受《蘋果》專訪，坦言跟應采兒結婚後收起火爆性格，自嘲現在是「成嚿番薯」：「哈哈哈，其實我識咗老婆都改變好多，拍緊拖時見到狗仔着㗎：『唔好搞我啦，行開啦！』老婆會拉住我：『喂喂！』、『睇我唔到，時運高行咗去算。』慢慢俾老婆調吓調吓，算罷啦，結埋婚之後，我同老婆睇戲，你（狗仔隊）唔好掂到我得啦，你有你做，我有我睇，加埋而家個仔出埋嚟，多一事不如少一事，變咗成嚿番薯，雖然脾氣一定有嘅，但唔係以前一撻就着。」

演唱會主題叫「STOP ANGRY」，即是息怒，小春坦言受囝囝啟發：「因為呢個騷同監製度咗兩年，之後殺咗個節目（《爸5》）出嚟，佢哋開頭講不如用呢個主題做演唱會，我心諗會唔會好似傾家蕩產嘔晒出嚟？佢哋話冇問題，跟住影埋海報，畫到花喱花綠，開頭我覺得好hard sell好唔型，佢哋話唔怕嘅，咁OK，當然搵得監製一定信佢。」

去年11月在成都舉行首站巡唱，Jasper只看了三分二，小春事先張揚會帶囝囝到澳門睇足全場：「今次澳門近，我諗佢應該走唔甩，去睇吓啦，睇吓爹哋平時做啲乜，因為我未同佢上節目之前，我成日出去做嘢，冇時間同佢相處，我係因為嗰個節目，先至真真正正同佢相處，同佢一齊瞓，幫佢梳洗換衫，我都未試過咁；對佢亦係一個比較好嘅經驗，原來呢個世界除咗香港，有啲地方生活條件唔好，生活好苦，我個仔能夠有機會去呢啲地方體驗生活，希望佢長大會珍惜，如果吓吓都：『公公，我要食飯』、『婆婆，我要飲嘢。』」小春搖頭：「嘩，張開手攞碗飯，張開手攞嘢飲，唔得嘅！」

外表似嚴父的小春，揚言絕不會打仔：「有朋友問我會唔會郁手打佢？黐線咩，而家乜年代，就算佢唔報警告你虐兒，佢係你親生，點會郁手打佢呢，除非佢犯錯就會罰佢，但一定唔會郁手；我最驚佢講大話，如跟同學去圖書館，其實去卡拉OK，人始終都會講大話，但對父母唔可以有呢個行為，父母係最親，有乜事要同屋企人講，香港幾百萬人，呢個社會有可能令你變咗一嚿叉燒，我已經同老婆講明，如果佢去第二度讀書，我都會跟埋去，我會離遠吊住佢。」

曾經，小春都如普遍父親般望子成龍：「而家朋友問我想個仔長大做乜？做個好人得啦，之前喺老婆個肚入面，我想個仔大個做醫生，幾叻呀，可以救人喎，害人好容易，救人係幾偉大嘅事。佢上個禮拜喺學校攞咗個獎，叫課外活動閱讀獎銅獎，因為佢平時好鍾意睇書，課外活動有彈鋼琴，彈得唔錯添，老師都話可以買琴畀佢，佢亦有學小提琴，老師話佢拉得好好，唔，good boy，呢種喜悅我唔識講，我驚佢周身刀冇張利嗰啲呢，佢sport又唔係幾掂，除咗游水。」

曾經的樂壇黑面神，現變了有子萬事足，並跟老婆努力造人追第二胎：「老婆就想要個女，咁對於我嚟講，我鍾意仔多啲，兩兄弟互相照應，女第時養大咗係嫁畀人，幫人養咋喎，其實到最後冇所謂，都係自己小朋友。」

撰文：余燕儀
攝影：葉君海
攝錄：林德雄
場地：HEXA六公館
化妝：Yan Chiu @ndnco
髮型：Cliff Lam @ Beijing Hair Culture