一拖二再宣稱單身「收兵港姐」 陳楨怡家境唔簡單 曾被傳係蒲精有錢女

2020年港姐亞軍陳楨怡(Celina)嘅感情生活成為呢期話題，同富貴男友Andy拍拖多時嘅Celina，早前被爆背住男友同有「港版李敏鎬」之稱嘅TVB前藝人周子揚撻著，但對外宣稱周子揚只係「認識嘅朋友」。殊不知周子揚直認同陳楨怡拍拖，仲向傳媒交出同陳楨怡視像兼短訊對話內容，儼如情侶一樣，而Celina就回應傳媒I’m Single（我單身），好複雜囉。

翻查陳楨怡嘅新聞，原來呢位港姐背景唔簡單。今年25歲嘅陳楨怡，姓氏英文串法係Harto唔係Chan，因為佢係印尼華僑後代。參選港姐期間有傳媒收到匿名爆料，指Celina家庭複雜，又暗示佢同妹妹唔係父母親生。Celina受訪時表示自己有2個同母異父嘅哥哥姐姐，同父母有血緣關係，四兄妹感情好好。

另外有傳陳楨怡爸爸係印尼富商，Celina 出入有司機接送，post嘅家庭照所見佢屋企環境頗為闊落，IG又有好多周遊列國嘅照片，Celina解釋因為大學讀建築，規定一年要去一次旅行，而佢都係跟學校去，所以只係外界誤會。佢又話自己出身小康之家，感謝父母送佢出國讀書，但係爸爸做邊行就唔方便講。

家底以外，選港姐期間已經陳楨怡被歸類為「是非精」。有網媒收到自稱Celina英國留學時嘅朋友爆料，踢爆Celina當時男友Andy係TVB藝人戴祖儀嘅前度，又話Celina讀書時係「蒲精」兼長期收兵，仲玩得好放，飲大咗就可以攬攬鍚鍚。陳楨怡之後承認Andy的確同戴祖儀拍過拖，但就否認係蒲精，仲話讀書好忙。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！