一舞傾城︳鄺潔楹家底厚 廿歲出頭買樓 計劃今年靠自己再買磚頭

TVB劇《一舞傾城》以夜總會為背景，當然唔少得大尺度劇情，劇中女角蔡潔同陳星妤都差啲被姦，陳星妤仲要賣初夜！另一「囡囡」鄺潔楹(Judy)因為賭債而要同練馬師玩SM，超激！現實中嘅鄺潔楹理財有道，家境富貴之餘自己亦會投資，咁大犧牲都係為套劇啫。

鄺潔楹父母做傢俬生意，一家人住大埔2000呎獨立屋。Judy前年為TVB節目《我要做業主2》做嘉賓，公開屋企環境，相當闊落！之前拍《七公主》Judy演劍擊手，佢就喺屋企停車場練劍，咁你知佢屋企有幾大。

鄺潔楹受訪時提到，屋企人自細就灌輸置業保值觀念，而佢大學畢業就同哥哥喺屋企幫忙之下，一齊買入跑馬地舊樓單位，據知已經市值過千萬。而Judy亦表示過希望31歲時靠自己實力再買多層樓，咦……咪即係今年？

買樓以外，鄺潔楹亦有唔少生意喺手。除咗同屋企人開投資公司，仲自己搞生意，包括創立自家曲奇品牌，並投資伍富橋有份嘅健身中心。身材嬌小嘅Judy又同時裝品牌合作，推出專門為「細細粒」女生而設計嘅服飾。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！