七仙羽簽名限量版卡索價$3500 網民叫七師傅舉行簽名會

玄學家七仙羽（七師傅）搞怪性格與出位金句深得網民歡心，亦榮升成「廣告女王」，有份演出嘅連鎖米線品牌廣告更喺2021年廣告頒獎禮勇奪9個大獎；最近七仙羽亦獲邀參演葉念琛執導嘅賀歲電影，與林盛斌（Bob）飾演夫妻，而早前播出嘅《七救星》大受歡迎，七師傅早前透露開拍續集《七福星》，預計於農曆新年推出。七仙羽人氣爆登嘅程度就連佢本人都估唔到，事關七仙羽噚日（7日）就喺IG分享拍賣網站截圖，指有人以3000元開價出售自己嘅親筆簽名「閃卡」，令佢大為驚訝。

所拍賣嘅「閃卡」其實只係一張普通啞卡，卡片上附疑似七仙羽簽名，不過七仙羽就表示：「我的簽名原來咁值錢，我自己都冇」，一班網民又留言指自己都想要七仙羽嘅簽名：「師傅我印張A0 poster 俾你幫我簽名可以嗎？」、「師傳舉行簽名會」、「我愛師傅！七師傅是我的偶像！」等等。

七仙羽之後又再出post分享，有賣家發售「人氣真跡簽名限量版七師傅Foxgo師傅愛你紀念卡」，指已開光，有助提升人緣、健康等，售價為3500元；七仙羽就以「笑樣」與「讚好」emoji回應，有網民就笑言師傅可以賣簽名做護身符。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！